Aına qoıdym aldyma,
Kóreıin dep ózimdi.
Eki qulaq tas bitip,
Shel basypty kózimdi...-dep keletin Shákárim qajynyń syr sózi ataqty órenimiz Denıs Tendi kóliktiń aınasyna bola pyshaqtap ketipti degendi estigende esime túse ketkeni. Nege? Nelikten osy óleń sózderi deısiz be, sebebi bizdiń qazirgi qoǵamnyń bet beınesi áýlıeniń osy sózimen bar qupıa syryn ashady. Bizdiń jemqorlyq jaılaǵan, kishkentaı sábıin boqqa batyrǵan, jetkinshegin, jasóspirimin aıýandyqpen aryn tógip, zorlaǵan, áıelzatyn qamap, qorlaǵan, jer anasyn da aýyq-aýyq satamyn dep zań shyǵarmaqshy bolyp, oǵan qarsylardy aıdap, túrmege jaýyp, Qytaı sıaqty jymysqy saıasaty bar ashkóz elden qaryz alyp, jumysshysyn, jansyzyn qurttaı qaptatyp, kıeli topyraǵymyzdy taptatyp, al qylmyskerin qamaýdan tez bosatyp, ult patrıottaryn abaqtyǵa qamap, ne kerek asty-ústine tóńkerilgen qoǵamymyz, onyń basyndaǵy bılik "nurly júzin" sol alaqandaı aınaǵa tossa neni kórer edi? Túkti de. Túıeniń tabanynan da qalyń betten ne kórýi múmkin? Bári aqshaǵa satylǵan ker ýaqyt. Sotta týrabıler joq. Aqsha tólese, kez kelgen qylmyskerdi bostandyqqa shyǵara salady. Kóshege kamera qaptatqany ne kerek, aıdyń-kúnniń amanynda qaraqshylar adam tonap, pyshaqtap kete beredi. Denıs Ten bolǵasyn áshkere bolyp qaldy bilem, áıtpese jaı adamnyń biri bolsa, mundaı shý bolmas ta edi. Kóshede emin-erkin júre almaıtyn bolsaq, onda tártip saqshylary nege kerek? Búgingi naýqanshyl, saýyqshyl, al ult múddesi men adamnyń ómirine kelgende toń moıyn, tas soqyr, tas kereń bıligi bar bolsa da týǵan elimiz jaıly jaman aıtqyń kelmeıdi-aq, biraq Denıstiń ornynda bizdiń kez-kelgenimiz bolýymyz múmkin... Sonda biz tynyshtyqty, baqýatty ómirdi Alladan tilesek te óz elimizde, jerimizde quzyretti oryndardan, bılikten suramaımyz ba eken? Olar jaýapty emes pe eken sonda?
Yndyny taza eshkim joq,
Syrtynda maı, ishinde oq.
Túp qaryny tolǵan boq,
Jasyryp júr munysyn... bizdiń qoǵam osyndaı bolǵan. Sonymen kóliktiń alaqandaı aınasy qansha turady? Olımpıadanyń qolasy? Álem chempıonatynyń kúmisi? Álde altynǵa shaǵamyz ba? Joq, altyn men kúmispen, tipti sol qymbat kólikpen taǵy basqasymen ólshenbeıdi eken onyń baǵasy. Onyń baǵasy - ADAMNYŃ ÓMİRİMEN ólshenedi eken. Iá, solaı. Muny búgin tapa-tal túste bildik. Avtokólik aınasynyń quny - Siz ben Bizdiń ÓMİRİMİZ eken... Mine, bizdiń shybyn janymyzdyń, ómirimizdiń quny... Ne deımiz? Baqul bol, jeńimpaz, qazaqstandyq jas óren Denıs Ten deımiz be, deımiz... Qazaǵym oǵan "ımandy bolsyn" dep te jatyr. Endi qaıtsin? Dini basqa bolsa da dili qazaqqa jaqyn, ataǵy shyqsa da Otanyn satyp, basqa jaqqa yǵyspaǵan jigit edi, qyrshynnan qıyldy. Uryp-soǵyp ketseshi? Joq, óıtpedi. Pyshaq suqty da janyn úzdi de jiberdi... Qazaqstan basshysy, úkimeti, zań saqshylary, soty barlyǵy da qymbat kólikterine otyrady. Sonda alaqandaı aınaǵa qaraıdy. Sonda neni, kimdi kóredi? "Aına qoıdym aldyma..."