Tájikstanda tyıym salynǵan Islamnyń jańǵyrýy men "Grýppa 24" tobynyń júzge jýyq burynǵy músheleri elge oralyp jatyr dep habarlady osy eldiń ishki ister mınıstrligi (İİM).

Olardyń deni 2015 jyldyń qyrkúıek aıynda general Abdýhalım Nazarzodanyń jasaǵan búliginen keıin Reseıge qashyp ketken.

Tájikstan ishki ister mınıstrligi ázirlegen vıdeosújette elge oralǵandar ózderiniń qateleskenderin, biraq zańǵa qaıshy qylmys jasamaǵandaryn, sol sebeptin bıliktiń úndeýinen keıin úıine qaıtqandaryn málimdeıdi.

Elge oralǵan "Grýppy 24" tobynyń burynǵy jeti múshesi qazir opozısıalyq qozǵalyspen eshqandaı baılanysy joq ekenin resmı málimdedi. Olardyń arasynda sońǵy ýaqytqa deıin áleýmettik jelilerde tájik bıligin ashyq synap kelgen azamattar da bar.

Sarapshylar burynǵy oppozısıonerler sheteldegi ómirdiń aýyrlyǵynan, amalsyz otanyna oraldy deıdi.

Tájikstan prezıdenti janyndaǵy strategıalyq zertteýler ortalyǵynyń dırektory ​Saıfýllo Safarov memlekettiń qýǵyndaǵy oppozısıonerlerge qatysty saıasaty ózgermegenin aıtady. Biraq eshqandaı qylmys jasamaǵan burynǵy músheler kez kelgen ýaqytta elge orala alady deıdi.