Burynǵy Ońtústik Qazaqstan, qazirgi Túrkistan oblysyndaǵy Abaı aýylynyń zorlandy degen jeti jasar turǵynyn qorǵap júrgen advokat Baýyrjan Azanovqa qarsy is qozǵaldy, dep habarlaıdy Qamshy.kz aqparat agenttigi.
Baýyrjan Azanovtyń aıtýynsha, advokatqa qarsy QR QK 274-babynyń 2-bóliminiń 3-bólimshesine sáıkes, Túrkistan oblysynda ózinen úlken synypta oqıtyn balalardyń tarapynan birneshe márte zorlyq kórdi degen 7 jasar balaǵa qatysty jazyp ári suhbat bergeni úshin aıyp taǵylypty.
Aıta keterligi, Baýyrjan Azanov zardap shegýshi balany tegin qorǵap júr. Aıtýynsha, balanyń quqyǵyn qorǵaý úshin ári-bergi jol aqysyn da óz qaltasynan shyǵarǵan.
«Munyń bárin men tek balanyń múddesi úshin jasadym. Kinálilerdi taýyp, sottyń aldyna jetelep aparǵym keledi. Bar bolǵany sol. Ózi isimmen aınalystym, ózgesine bas suqpadym. Sonda qalaı, adamdarǵa jasaǵan jaqsylyǵyń ózińe jamandyq ákeledi me? Álde bizge senip otyrǵan adamdardy tolyq qorǵaı almaımyz ba? Áıteýir bir kúni aıyptalady ekenmin dep eshkimdi qorǵamaıyq pa? Advokattyq qyzmetke garantıa bar ma bul qoǵamda?», - dep ashyndy Baýyrjan Azanov óziniń Facebook-tegi paraqshasynda.
Kishkentaı ǵana búldirshinniń quqyǵyn qorǵaýda tegin jumys istep júrgen advokatty endi halyq qorǵap jatyr. Qoǵam belsendileri Baýyrjan Azanovty qorǵaý úshin Qazaqstan azamattarynan qol jınamaq.
«Almatylyqtar meni qoldaý úshin qol jınamaq. 25 shildede Seıfýllın kóshesiniń boıyndaǵy Mega saýda ortalyǵyna men úshin jınalmaqshy», - degen Baýyrjan Azanov tań qalysyn jasyrmady.
Al qoǵam belsendileri zardap shekken qazaqstandyqty, onyń ústine kishkentaı balanyń quqyǵyn memleketten de, qorǵalýshy taraptan da bir tıyn almaı qorǵap júrgen advokatqa zań tıispeý kerek dep sanaıdy.
«Azǵyndaǵan zamanda jeti jasar balany qorlaýshylar emes qorǵaýshylardyń artyna shyraq alyp túsedi. Zorlandy degen jeti jasar saryaǵashtyq balany alǵash ret ótemaqysyz qorǵaýshy advokat Baýyrjan Azanovtyń ústinen is qozǵalypty. Oý, aǵaıyn, bul netken sumdyq! Zorlanǵan balanyń aqysy ketti. Endi ony qorǵaýshysynyń ózine is qozǵalýda», - dep jazǵan Baýyrjan Jaqsybaev halyqty qol qoıýǵa shaqyrdy.
Bıyl mamyrda qazirgi Túrkistan oblysy Abaı aýlynyń turǵyny "nemerem birneshe jyl boıy zorlanyp kelgen" dep búkil Qazaqstandy dúr silkindirgen edi. Aıtýynsha, jeti jastaǵy balasyn úlken synyptyń oqýshylary birneshe márte zorlaǵan. Tıisti organdarǵa shaǵym túsirgenimen alǵashynda tyrp etken tiri jan bolmady. Al qazirgi ýaqytta balanyń jaǵdaıyna qazaqstandyqtardyń bári derlik alańdaýly.
