Almatyda grýzıalyq belgili keskindemeshiniń  jetekshiligimen zaǵıp sýretshilerdiń kórmesi ótti.

Grýzındik kórkem sýret sheberi Georgıı Gýraspashvılı Almatydaǵy zaǵıptar qoǵamynda bolyp, ondaǵy talanttardyń shyǵarmashylyq kórmesin uıymdastyrdy.

«Men kórkem sýret Akademıasynda 15 jyl beıneleý ónerinen sabaq berdim. Sonda meniń bir stýdentimniń kózi kórmeı qaldy. Biz onyń bul ónerin ári qaraı jalǵastyrý úshin jol izdedik. Munda ózimmen birge kózi kórmeıtin sýretshilerge arnalǵan baǵdarlamamdy ala kelgen edim»,-deıdi Georgıı Gýraspashvılı.

Stýdentiniń basyna túsken qıyn jaǵdaıdan keıin ol  uzaq izdenedi. Zaǵıptar álemin zerttep, múmkindigi shekteýli jandardyń sýret salýyna jaǵdaı jasaýdy uıǵarady.

«Biz bir-birimizge árdaıym kómektesemiz, úıretemiz. Sýretshilerde osyndaı jazylmaǵan zań bar. Ár sheberdiń óz qoltańbasy bar. Sol arqyly túısigindegini kenepke túsiredi. Osyny zertteı kele Grýzıada zaǵıp sýretshiler odaǵyn qurdyq. Erekshe jandarǵa arnap oqytý ádistemesin jasadyq. Olar arnaıy kenepti quraldyń kómegimen tyrnaıdy. Sonyń izimen boıaý júrgizemiz. Nátıjesinde sýret paıda bolady»,-dedi grýzındik sýretshi.

Alaıda sýretshi Qazaqstanda zaǵıp sýretshiler odaǵyn qurý úshin sheneýniktermen kezdese almaǵanyna qynjylady.

«Almatyda sýret salýǵa qushtar jandardy kezdestirdim. Olar meniń qalýymdy ótindi. Biraq qarjylaı múmkindigim joq»,-deıdi ol. Sýretshi kózi kórmeıtin talanttardy izdep, álemdi aralaǵan.