Qoǵamda órship turǵan óte qaýipti másele – pedofılıa derti. Búginde elimizde pedofılıa epıdemıasy júrip jatqan sekildi. Búldirshinniń ómiri opat bolǵany jaıly jańalyqtar kún sanap kóbeıýde, al qoǵam jaǵasyn ustap, tańǵalýdan, ári ketse jelide otyryp qylmyskerlerdi qarǵap-sileýden ári asa almaı otyr. Al quzyrly organdardan pedofılderge ólim jazasyn surap jatqandardyń qarasy búginde kóp bolsa da, baıaǵy jartas bir jartas... esh ózgeris joq, al pedofılderdiń qurbany bolyp jatqan búldirshinder men olardyń et jaqyn týystary tek san soǵyp qalýda. Bul máseleniń kúrmeýi sheshile me, álde osylaı jalǵasa bermek pe?

Birneshe kún buryn Almaty oblysynda 6 jastaǵy qyzdyń zorlyqqa ushyraǵany jaıynda aqparat shyqqan bolatyn. Ony advokat Aıman Omarova, eń aldymen, óziniń feısbýk paraqshasynda jarıalaǵan. Keıinnen Qamshy.kz aqparat agenttiginiń tilshisine bergen suhbatynda istiń mán-jaıyn tolyq aıtyp berdi.

Onyń aıtýynsha, 6 jastaǵy búldirshin 2 tamyz kúni 15-16 jas shamasyndaǵy kámeletke tolmaǵan jasóspirim zorlap ketken.

«Oqıǵa bolǵannan keıin qyzdyń ata-anasy dereý Qarasaı aýdanynyń tergeý bólimine barǵan. Alaıda ol jerdegiler ekspertıza jasaýǵa qujatty ýaqytyly bermeı, sozyp júrip alǵan. Sonymen qatar, bul iske qatysty tergeý jumystaryn bastaýǵa da quzyrly organdar asyqpaı, tek feısbýkke jazyp, qoǵamnyń talqysyna túse bastaǵannan keıin ǵana olar qozǵala bastady. Tek sodan keıin ǵana osy isti qolǵa aldy.

Jábirlenýshige saraptamany der kezinde jasamasa qıyn. Birneshe kún ótip ketkennen keıin denedegi kógergen, qyzarǵan jerler bilinbeı qalady. Keıinnen qylmystyq ispen aınalysyp júrgender eshnárse bolǵan joq dep aıtady», - deıdi zańger.

Belgili bolǵandaı, quzyrly organdar bul isti qolǵa alyp, tergeý jumystary bastalǵannan keıin jábirlenýshiniń úıine Qarasaı aýdanynyń bilim basqarmasynyń mamandary, qylmyskerdiń týystary kelip, zorlyq kórsetken balaǵa keshirim berýdi talap etken.

«Kúndiz kishkentaı qyz ákesimen qalada bir sharýalarymen júrgen kezinde, saǵat 15:00 shamasynda olardyń úıine bir top adam kelip, kelisimge kelýdi qalaǵan. Anasy olardy kirgizbeı qýyp jibergen. Keıinnen túngi 22:00 shamasynda on shaqty adam olardyń úıine taǵy da kelip, zorlyq kórsetken balany keshirim berýdi talap etken. Zorlyqqa ushyraǵan qyzdyń ata-anasynyń qarsylyǵyna qaramastan keshirimdi talap etýshiler úıdi torýyldaýyn toqtatpaı, ertesine saǵat 9:00-de taǵy da kelip, dittegen maqsattaryna qol jetkize almaǵannan soń, sol kúni saǵat 15:00 shamasynda mektep dırektory qyzdyń ata-anasyna kelip: «Ol bala qınalyp jatyr, asylyp ólemin dep aıtyp jatyr» degen sózder aıtyp, «keshirim berińizder, keshirim bermeseńizder bizdi jumystan shyǵarady» dep qyzdyń ata-anasyn kóndirmek bolǵan. Qansha tyryssa da, qyzdyń ata-anasy olardyń aıtqanymen kelispeı, jylarman bolyp maǵan keldi, kómek surady», - deıdi advokat Aıman Omarova.

Búginde qoǵamda zorlaý faktileri kóbeıip, azǵyndyq is-áreketter beleń alýda. Al jábir kórgen jazyqsyz adamdar óziniń quqyǵyn taptalǵanyn alǵa tartyp, zań arqyly ádildikke qol jetkizý ońaı emes. Zańgerdiń aıtýynsha, zorlyqtyń qurbany bolǵan adamdar saraptama jasatý úshin beriletin qaǵazyn ýaqytyly ala almaıdy. Ekspertıza der kezinde jasalmaǵannan keıin kóptegen qylmystardyń beti ashylmaı, jabýly kúıinde qalyp qalyp jatyr.

Qoǵamda adam quqyǵy taptalyp, birshama taǵdyrlar tálkige túsip jatsa da, qylmyskerler bolmashy jazamen qutylyp ketip jatyr, sonyń saldarynan da azǵyndyq is-áreketterdiń azaıatyn túri joq, tek kún sanap kóbeıýde.

«Búginde zorlyqqa ushyrap jatqan qyzdardy qoǵamda ózderin aıyptaıdy. Qysqa kıedi, ashyq-shashyq kıinip, shashylyp júredi deıdi. Al 6 jastaǵy qyzdyń jaǵdaıy she? Oǵan ne aıtady sonda?» - deıdi advokat.

Jábir kórgen balany qorǵaýyna alǵan advokat Aıman Omarova búginde bul máseleniń keńinen etek jaıyp ketkendigin aıtyp, qandaı da bir shara qoldaný qajet deıdi.