Jumys sapary kezinde qalanyń tarıhı ortalyǵyn aralaǵan meagpolıs ákimi Baýyrjan Baıbek Abaı kóshesindegi 69 úıde ornalasqan Túrksib aýrýhanasynyń burynǵy ǵımaratyn Almatynyń sáýlet eskertkishteri tizimine engizýdi tapsyrdy. Nysan 1950 jyldary arhıtektor Mıhaıl Kýdrávsevtiń jobasy boıynsha salynǵan. Onyń basty kire berisi men qaptaldary, jaqtaýlary tórt jaqty kompozısıalyq baǵanalarǵa tirelgen. Qaptaldardyń arkalary, lúnetteri tańbaly beldeýlermen óńdelgen. Ǵımarat «ulttyq stılde» salynǵan kónelerdiń biri bolyp tabylady ári onyń sáýletinde klasıkalyq jáne óńirlik sıntez ózara ushtasqan, ıaǵnı Almaty magıstrali qurylysynyń basty elementi bolyp tabylady. Syrtqy soltústik qabatynda ishki aýla jáne jasyl jelekke oranǵan keńistik bar.

Qazaqstan Respýblıkasynyń «Tarıhı-mádenı mura obektilerin qorǵaý jáne paıdalaný» Zańynyń negizinde obektini tizimge engizý oǵan tarıhı jáne mádenı eskertkish mártebesin beredi. Zańǵa sáıkes ony paıdalanýshy eskertkishtiń qorǵalýyn qamtamasyz etýi tıis. Iaǵnı, ǵımaratyń syrtqy kelbetin, ishin, konstrýksıalaryn, maqsatty paıdalanylýyn, aýmaǵyn ózgertýge tyıym salynady. Jóndeýge, qaıta jasaýǵa baılanysty atqarylatyn sharalardyń barlyǵy ókiletti organmen kelisý arqyly júzege asady.

Eske salsaq, buryndary Almaty ákimi Baýyrjan Baıbek zańǵa sáıkes qalanyń ıpodromy men «Saıran» avtovokzalyn jergilikti mańyzy bar tarıhı eskertkishter tizimine engizýdi tapsyrǵan edi. Artynan ǵımarattyń burynǵy kelbetin qaıtarý jóninde jumys bastalyp, zańsyz qurylystar alynyp tastaldy.