Almaty ákimi Baýyrjan Baıbek kúndelikti jumys sapary kezinde megapolıstiń kólik jáne jaıaý júrginshi ınfraqurylymyn jańǵyrtýdyń barysyn tekserdi.

Byltyrǵy jyldan jalǵasyp kele jatqan qalanyń tarıhı ortalyǵyn qaıta jasaý aıasynda jańarǵan Panfılov, Jibek Joly, Gogol, Qabanbaı batyr, Baıseıitova, Tólebaev jáne «Astana» alańymen qosa Almatynyń birqatar dańǵyldarynda kúrdeli jóndeý jumystary júrýde.

Bıylǵy jyly Abaı, Abylaı han, Nazarbaev, Dostyq, Jeltoqsan dańǵyldary, Abaı alańy men «Almaty-2» temirjol vokzalynyń aldy qaıta jasalýda. Qazirgi kezde munda júrginshi aımaqtaryn keńeıtý, rekonstrýksıalaý jáne jańa fontandar salý, kishi pishindi sáýlet formalary men kósheniń zamanaýı jıhazdaryn ornatý, kóleńkeli keńistikterge japyraqty aǵashtar otyrǵyzý, burynǵy jasyl jelekti saqtap qalý jumystary júrýde.

Bulardan ózge, atalǵan ýchaskelerde ınjenerlik jeliler tolyq aýystyrýlda, kespe tastar tóselip, aryqtar, sýarý júıeleri jańalanýda, nysandardyń syrtqy kelbetteri ózgerýde. «Qaýipsiz qala» aıasynda burynǵy eski jaryqtardyń ornyna zamanaýı ıodty shyraqtar ornatylýda.Rekonstrýksıalanǵan kóshelerge zamanaýı baǵdarsham keshenderi qoıylady jáne kóshe burylystaryndaǵy barlyq eski metal konstrýksıalar joıylady. Merdigerlik uıymdar jaıaý júrginshi qozǵalysyn qıyndatatyn qoldanylmaıtyn konstrýksıalardy, kóptegen dińgekterdi, qorshaýlar men zańsyz salynǵan qurylystardy alyp tastaýda.

Respýblıka Saraıy aldyndaǵy Abaı alańynda fontandar men elektr jaryqtaryn montajdaý bastalady. Budan ózge, oǵan jaqyn ornalasqan «Arman» kınoteatrynyń fasady jańaryp, «Qazaqstan» qonaq úıine túngi jaryq ornatylady. Al «Almaty-2» temirjol vokzalynyń mańynda qaýipsizdikti uıymdastyrý maqsatynda kólik logıstıkasy túgel qaıta qaralyp, jasyl jelek ulǵaıady.

Jalpy, qala kóshelerin jóndeý barysynda aýlaǵa baratyndaı etip jańa trotýarlar salynady, al bul jaıaý júrginshiniń qaýipsizdigin kúsheıtedi.

Dál osy kúni Baýyrjan Baıbek Almatynyń tyǵyz ornalasqan aýdandaryn qamtıtyn Tımırázev kóshesi boıyndaǵy júrdek avtobýs dálizi qurylysynyń barysyn tekserdi.

Kóshelerdi rekonstrýksıalaýmen qatar munda trotýarlardy, aryqtardy, velojoldardy jóndeý, ınjenerlik jelilerdi qaıta ornalastyrý, zańsyz qurylystar men qorshaýlardy alyp tastaý qatar júrýde. Qozǵalys bóligindegi jol-qurylys jumystaryn bıylǵy aıdyń sońyna deıin aıaqtaý josparlanǵan.

Sonymen qatar BRT dálizinde avtomobılderdi boldyrmaý sharalary jasalýda. Qazirgi kezde qalanyń barlyq aýdandarynda 160 kósheni jóndeý aıaqtalyp qaldy, kishi aınalma jolda kólik ótkizý qabiletin arttyrý úshin jańa úsh jol aıryǵy salynýda, qozǵalys aýmaǵyn keńeıtý úshin tarmvaı joldary alynýda, qalanyń segiz aýdanynda birjaqty qozǵalys uıymdastyrylýda.

Jumys sapary barysynda megapolıs basshysy Nazarbaev dańǵylynan Jansúgirov kóshesine deıingi úńgileý jumysymen tanysty, al bul Seıfýllın dańǵylynda « Solústik- Ońtústik» bǵytyndaǵy kólik júktemesin azaıtady.

Qazirgi kezde munda barlyq dińgekterdi (baǵandar, qabyrǵalar jáne basqalary) ornatý jumystary tolyq aıaqtalǵan, satyly irgetas qondyrǵysy jasalýda. Sonymen qatar estakadanyń metal jaqtaýyn, qorshaýlardy, sý qubyrlaryn qaıta jasaý, qorǵanys qabyrǵasyn salý jumystary júrýde.

Aıta keterligi, osy jazda Almatyda uzyndyǵy 160 km bolatyn 150–den astam kóshe jańardy, barlyq jer asty ótpeli joldar kúrdeli jóndelýde. Ortalyqtandyrý qaǵıdasy boıynsha qalanyń barlyq aýdandary abattandyrylýda. Eger ótken jyly 500 aýla jóndelse, bıylǵy jyly qalanyń barlyq aýdandarynda taǵy da 600-den astam aýla jańarady.

Sońǵy jyldary megapolıste 800 km ınjenerlik jeli, sonyń ishinde 313 km sý qubyry, 266 km kanalızasıa, 150 km elekter jáne 32,3 km jylý jelileri qaıta jasaldy, jóndeldi.