«Rýhanı jańǵyrý» baǵdarlamasy aıasynda QR Prezıdenti ákimshiligi ár ólkeniń tarıhyn qamtıtyn «Ólketaný» oqýlyǵyn daıyndaýdy tapsyrdy. QR Bilim jáne ǵylym mınıstrliginiń Y.Altynsarın atyndaǵy Ulttyq akademıasy 5-7 synyptarǵa arnalǵan «Ólketaný» kýrsynyń oqý baǵdarlamasyn ázirledi. Jańartylǵan oqý baǵdarlamasyna sáıkes ár óńirdiń óz oqýlyǵy daıyndaldy. Batys Qazaqstan oblysynda da bul oqýlyqty qurastyrýǵa joǵary oqý oryndarynyń ǵalymdary, tarıhshylar, ólketanýshylar, tájirıbeli pedagogter, ádiskerler tartylyp, saraptaý komısıasy jumys jasady.

– 5-7 synyptarǵa arnalǵan «Ólketaný» oqýlyǵy óskeleń urpaq týǵan ólke tarıhyn, mádenıetin, tarıhı tulǵalaryn, tarıhı-mádenı oshaqtaryn bilip, kórip, sanasyna sińirip óssin degen maqsatpen jasaqtaldy. Birneshe ret memlekettik deńgeıde saraptamadan ótkizildi. Eskertpelerimen qaıtyp ta keldi, qaıtadan jumystanyp, komısıa otyrysynda talqyǵa túsip, endi baspaǵa jiberilgeli tur. Kez-kelgen dúnıeni jańartyp, jańǵyrtyp otyrý zaman talaby. Biraq tarıhı faktiler, tarıhı-mádenı eskertkishterimiz ózgermeıdi. Al ǵylymı izdenister arqyly qosymsha aqparat paıda bolsa, ony qosýǵa daıynbyz. Sondyqtan bul oqýlyq ta qatyp qalǵan dúnıe emes, áli talaı tolyqtyrylady, - dedi oblys ákiminiń orynbasary Ǵabıdolla Ospanqulov.

Oblystyq bilim basqarmasy basshysynyń orynbasary Záýre Ǵumarovanyń aıtýynsha, oqýlyq 34 myńnan astam danamen «Arman-PV» baspasynan basylyp shyǵady. Tórt pán - qazaq tili men ádebıeti, geografıa, mýzyka, Qazaqstan tarıhy pánderine kiriktirilip oqytylady. Oqý júktemesiniń kólemi – 20 saǵat dep belgilenip otyr.

– Shaǵyn kitapqa batys aımaqtyń mektepte oqylyp júrgen tarıhyna enbegen, ense de az berilgen málimetterdi tolyqtyryp, balany oılandyratyndaı materıaldardy jınap, basyn biriktirip shyǵarý - úlken jumys. Sol qyrýar jumystyń kýási boldym. Syn da aıtyldy, pikirtalas ta boldy. 202 bettik kitapqa búkil Batys Qazaqstan oblysynyń óńirlik tarıhyn syıǵyzý, ony 6-7 synyptyń balasyna túsinikti qylyp qalaı beremiz degen oı tolǵandyrdy. Qadyr aqyn «Burynǵynyń balalary ata-anasyna tartyp týatyn edi, qazirginiń balasy zamanyna tartyp týady» deıdi ǵoı. Sol zamanyna tartyp týǵan balaǵa zamannyń zymyran aǵysynan ozatyn oı salatyn oqýlyq jazýymyz kerek boldy. Mine, osy baǵyttaǵy jumys bastaldy. Bilim salasyndaǵy talaı ózgeris, jańalyq elge jetip jatyr ǵoı. Sonyń ishinde balany ultjandylyqqa, eljandylyqqa, óziniń týǵan ólkesine qyzyǵýshylyqqa jeteleıtin sátti bastama osy oqýlyqty jazý dep esepteımin. Kitap balalardyń qajetine jarasyn, tarıhyn tanýǵa, ólkeniń

órnekterin ómirge sińirýge sep bolsyn, - dedi aıtysker-aqyn, til janashyry, oqýlyqtyń saraptaý keńesiniń múshesi Sholpan Qydyrnıazova.

Ólke tarıhynyń eń basty derekterin qamtyǵan oqýlyq 2018-2019 oqý jylynda shákirt qolyna tıedi.