Qazaqstanda eki-aq dárethana álemdik standartqa saı keledi. Olar Astanadaǵy N.Nazarbaev áýejaıynyń jańa termınaly men elordadaǵy jańa temirjol vokzalynda ornalasqan. Bul týraly búgin QR Mádenıet jáne sport vıse-mınıstri Erlan Qojaǵapanov aıtty, dep habarlaıdy Qamshy.kz aqparat agenttigi Baq.kz-ke silteme jasaı otyryp.

Vıse-mınıstrdiń aıtýynsha, Dúnıejúzilik týrısik keńes normasyna saı ár 50 shaqyrym saıyn bir dárethanadan bolýy tıis. Ári álemdik standartqa saı bolý úshin ájethana sapaly bolýy kerek. Onda mindetti túrde ystyq sýy bolýy tıis.

«Biz jańa zań jobasynda jol boıyndaǵy servıske basa nazar aýdaryp otyrmyz. Biz qaı joldy alsaq ta olardyń boıynda eshqandaı servıs joq. Jóni túzý dárethana joq. Biz eriktilerdiń kómegimen eldegi búkil ájethanany tekserdik. Qazaqstanda halyqaralyq standartqa saı eki aq dárethana bar. Bireýi – Astanadaǵy N.Nazarbaev áýejaıynyń jańadan salynǵan termınalynda, ekinshisi – elordada jańadan salynǵan temirjol vokzalynda ornalasqan. Ókinishke oraı, elimizde halyqaralyq normaǵa sáıkes basqa birde-bir ájethana joq», - dedi Qojaǵapanov.

Vıse-mınıstrdiń málimetinshe, Qazaqstanda jol boıyndaǵy servısti kózdeıtin KazWay jobasy áli shıki, oǵan qazir ózgerister engizilip jatyr.

«Búgingi tańda sheteldik týrıser joldan dárethana taba almaıdy. Al bar ájethanalardyń túri adamdy uıaltady. Sol úshin biz jańa zańda jáne memlekettik baǵdarlamada jol boıynda turǵan mekemelerdi memlekettik jeńildiktermen qamtamasyz etý máselelerin qarastyramyz. Osy salada endi belsendi jumys atqaramyz», - dedi Erlan Qojaǵapanov.

Atap ótsek, búgin Ádilet mınıstrliginde «Qazaqstan Respýblıkasynyń keıbir zańnamalyq aktilerine týrısik qyzmet máseleleri boıynsha ózgerister men tolyqtyrýlar engizý týraly» Zań jobasynyń tujyrymdamasy qaralǵan bolatyn.