Sarapshy Erbol Edilov óziniń YEDILOV ONLINE telegram-arnasynda Qazaqstan bıligindegi aýys-túıisterge boljam jasady.

«Keı derekkózderdiń aqparattaryna sensek, jýyq arada joǵarǵy bılik eshelondarynda úlken aýys-túıister oryn almaq. Bul joly Astananyń sol jaǵalaýyndaǵy mańyzdy tulǵalar ornyna qozǵalaıyn dep tur. Ózgerister úkimette ǵana emes, prezıdent ákimshiligi, qaýipsizdik keńesi, ulttyq qaýipsizdik komıteti, sonymen qatar ákimder korpýsyna da qatysty», - dep jazdy Edilov.

Buǵan qosa sarapshy kim kelip, kim ketetinin de boljap kórdi.

«Eldiń batys óńirinde transporttyq áleýetin arttyrý úshin aımaqtyń basshysy retinde búgingi ınvestısıa jáne damý mınıstri Jeńis Qasymbekti jiberýi múmkin. Sonymen qatar ınvestısıa jáne damý mınıstrligin kólik jáne ónerkásip mınıstrligine bólýge týra keledi.

Elbasynyń Atyraýdaǵy polısıa jóninde aıtqanynan ishki ister mınıstri Qalmuhambet Qasymov laýazymynan bosatylady. Bul laýazymda mınıstr 7 jyl 4 aı otyr.

Qarjy mınıstrligi de úlken ózgeristerge tap bolýy múmkin. Mınıstr Baqyt Sultanov qyzmetinen bosatylady.

Derekkózderge súıensek, jýyrda ǵana Astanaǵa kelip ketken Imanǵalı Tasmaǵambetov elge qaıtyp, úlken laýazymǵa taǵaıyndalýy ábden múmkin. Eks-premer-mınıstr Serik Ahmetovke kvazı memlekettik sektordan bir oryn buıyrady», - dep jazdy ol.