28 jastaǵy Astana turǵyny Maqpal Espenbetova masa shaǵyp, kózi isip ketken soń birinshi qalalyq aýrýhanaǵa barady. Biraq dárigerler ýkol salǵan soń kelinshek til tartpastan qaıtys bolady. Aýrýhanadaǵylardyń aldyn ala qorytyndysy boıynsha ol anafılaktıkalyq shoktan kóz jumǵan. Biraq marqumnyń týystary táýelsiz saraptama júrgizip, dárigerlerdiń aıtqanyna senbeı otyr dep jazady Qamshy.kz aqparat agenttigi Sputnik Qazaqstan saıtynyń deregin negizge alyp.
Maqpal Espenbetovany búgin týǵan-týysy Semeı qalasynda jerlep jatyr. Bolǵan jaǵdaıdyń mán-jaıyn Maqpaldyń jaqyn qurbysy Bıben Júnisova aıtyp berdi. Bıben Maqpaldy masa shaqqan kúni de, aýrýhanaǵa barǵan kúni de qasynda bolǵan eken.
"2018 jyly 30 tamyz kúni qurbym Maqpal ekeýmiz dıplomatıalyq qalashyqqa bardyq. Ondaǵy maqsatymyz – qurbym jýyrda ǵana kólik alǵan edi. Sol aýdanda kólik azaıǵan soń, ol mashınasyn júrgizip úırengisi kelgen. Sol jerde Maqpaldyń bir kózin masa shaǵyp aldy. Kádimgi kúnde ózimiz kórip júrgen masa. Kózi isip ketti", — deıdi Bıben Júnisova.
Marqum 31 tamyz kúni tańerteń qurbysy Bıbenge kóziniń sýretin jibergen. Bıbenniń aıtýynsha, kóziniń isigi sál basylsa da, Maqpal dárigerge barǵaly otyrǵanyn aıtypty.
"31 kúni tańerteń qurbym maǵan kóziniń sýretin jiberdi. İsigi sál qaıtqan, biraq ol báribir dárigerge baryp, konsýltasıa alǵysy keldi. Sóıtip, 31 tamyz kúni kúıeýi eki balasymen Maqpaldy Qoshqarbaev kóshesi, 66 meken jaıyndaǵy Astana qalalyq 1 aýrýhanaǵa alyp bardy. Maǵan bara jatqandaryn aıtty. Taksıkologıa bólimine baryp, kezek aldy. Joldasy men eki balasy kólikte kútken. Kezek kóp bolǵan soń, ári balalardyń mazasy ketken soń joldasy balalardy úıine alyp ketken. Balalaryn úıge qaldyryp, qaıta aýrýhanaǵa kele jatqanda oǵan "áıelińiz qaıtys boldy" degen habar kelgen", — deıdi marqumnyń qurbysy.
"Naýqas masa shaqqannan kóz jumdy"
Bıben Júnisova aýrýhanaǵa kelgende marqum Maqpaldyń denesi sýyp ketken eken. Dárigerler Maqpaldyń kúıeýi men qurbysyna "ol anafılaktıkalyq shoktan" qaıtys boldy degen.
"Men kirip, marqumnyń denesin ustaǵanda, muzdap ketken. Aýzynda tútiksheler jatty. Dárigerler oǵan "Prednızolon" degen preparat saldyq dedi. Birden aıta keteıinshi, Maqpaldyń negizi alergıasy bar. Sondyqtan da ol masa shaqqan soń ózdiginen emdelmeı, dárigerge barǵan. Dárigerge eskertken eken, biraq qandaı da bir ýkol salýǵa ruqsat bermegen. Onyń ólimine qatysty toltyrylǵan qaǵazdardy biraq kórdim. Ol esh jerge qol qoımaǵan, aýrýdyń tarıhy bos. Sodan men birden oǵan ýkol salǵan dárigerdi de, onyń kómekshisin de beınege túsire bastadym", — deıdi Bıben Júnisova.
Bıbenniń aıtýynsha, dárigerler ózderin kináli sezinbegen jáne bolǵan jaǵdaıdy tez "jýyp-shaıǵysy" kelgen. Bıben kirip, qujattardy qaraı bastaǵanda, dárigerler jınalyp, basqa jaqtan toltyrylǵan qujattardy ákelgen.
"Bizge bergen analız paraqshasynda "naýqastyń salmaǵy 71 kg, er adam" dep jazylyp turdy. Maqpaldyń salmaǵy nebary 54 kg. Dárigerler ýkol salǵannan keıin ol qusyp, qysymy túsip ketken de til tartpaı qaıtys bolǵan. Endi bizge bergen qorytyndy qujatta "naýqas masa shaqqannan keıin kóz jumdy" dep jazylyp tur", — deıdi Bıben Júnisova.
Densaýlyq saqtaý mınıstrligi ne deıdi?
Qazaqstannyń densaýlyq saqtaý vıse-mınıstri Lázzat Aqtaevanyń aıtýynsha, medısınalyq qorytyndy – anyqtalmaǵan shok. Áıel adamnyń qazasyna ne sebep bolǵanyn anyqtaý úshin ulpalardy qosymsha zertteý, preparattarǵa toksıkologıalyq saraptama júrgizý qajet.
"Osy nátıjelerdi alǵan boıda óliminiń naqty sebebi belgili bolady", —dep habarlady vıse-mınıstr.
Aqtaeva atap ótkendeı, erejelerge sáıkes, kez kelgen medısınalyq prosedýrany júrgizgende naýqastan jazbasha ruqsat alynady.
Marqum bolǵan kelinshekten jazbasha kelisim alyndy ma, joq pa – medısınalyq qujattardy tekserý barysynda anyqtalady.
"Joldasy birneshe ret esinen tandy, al qyzynyń júregi aýyrady"
"Kúıeýi bul qaıǵyǵa senbeıdi. Birneshe ret esinen tanyp, qaıǵydan qars aıyrylǵaly júr. Eki balasyna aıttyq. Qyzy shala týǵan edi, osy qarasha aıynda júregine operasıa jasaý kerek. Aıdyń kúnniń amanynda eki balanyń anasy masa shaqqannan qaıtys boldy degenge kim senedi!?", — dep qynjyldy Bıben Júnisova.
