Almaty oblysynda kólikterine at sekirip, 14 jastaǵy qyzynan aıyrylǵan otbasy jylqyshyny taýyp, jazalaýdy talap etip otyr. Óıtkeni, tas jolyna úsh birdeı jylqyny aıdaǵan er adam oqıǵa ornynan qashyp ketipti. Al, jeńil kólikte otyrǵan bir áýlettiń jeti adamy túgelimen jaraqattanyp, aýrýhanada jatyr. Onyń tórteýi bala. Bireýi sol jerde kóz jumǵan dep habarlaıdy Qamshy.kz aqparat agenttigi Eýrazıa birinshi arnasyna silteme jasaı otyryp.
Jantúrshigerlik oqıǵa qyrkúıektiń 17-nen 18-ne qaraǵan túni saǵat 11 jarymdar shamasynda bolǵan. Bajasynyń úıinen qonaqtan shyqqan otbasy dál osy "Talǵar-Aqbulaq" tas jolyna kelgende myna jaqtan úsh jylqy shyǵyp, onyń biri kólikke qaraı sekiripti. Jylqynyń bir tuıaǵy júrgizýshige, ekinshisi aldynda otyrǵan 14 jastaǵy qyzdyń basyna tıgen. Rólge ıe bola almaǵan júrgizýshi jylqymen birge súıretilip myna aǵashqa soǵylypty.
Eki kúnnen beri bet-aýzy isip, endi ǵana tilge kelgen kelinshek tuńǵyshynan aıyrylyp qalǵanyn da bilmeıdi. Aıaǵy aýyr bolǵandyqtan qyzynyń qazasyn týǵandary áli estirtpepti. Biraq, jolǵa júgirgen attardy alǵash kórgen men edim deıdi. Artta otyrǵan tórt balamdy qushaqtap qana qorǵaı aldym dep jylaýda. Mıy shaıqalyp, murny synǵan áıeldiń qursaǵynda 28 aptalyq taǵy bir sábıi bar.
«Men kórdim attardy. At, at dep aıqaıladym. Keıin balamdy qushaqtadym" – deıdi zardap shegýshi Gúlzada Begimbetova.
Sodan beri eki kún ótse de aınalasynda áli qannyń izderi men kólik bólshekteri shashylyp jatyr. Qatty soqqydan otbasynyń túgel múshesi jaraqat alǵan. Júrgizýshi áýlettiń bajasy eken. Tórt balasymen kelgen qaıyn apasyn úıine jetkizýdi jón kóripti. Óziniń eki jasar ulyn da erte shyqqan. 14 jastaǵy baldyzy aldyna otyramyn dep qoımapty. Sonda segiz adam syıǵan temir tulpardyń terezesinen kádimgi tulpar kirip, qysyp tastaǵan.
«Men demala almaı shyqtym da, kishkene jerde otyr edim. Anaý kisi qarap tur eken, aıdaǵan adam atty. Bir kezde jan-jaqtan mashınalar kele bastaǵan. Svetinen qasha bastady, kórip qoımasyn dep» - deıdi zardap shegýshi Medhat Bekturov.
Jylqyshyny otbasy sol boıy tappadyq deıdi. Al, Talǵar aýdandyq aýrýhanasyna aıaq-qoly synyp, mıy shaıqalyp, bet-júzin shyny syrǵan barlyǵy túsken. Bir jarym jasar jáne ekidegi eki ul erteńine shyǵarylypty. Qatty jaraqatty aldynda otyrǵan úıdiń tuńǵyshy alǵan. Jylqynyń tuıaǵy basyn ezip jiberipti. Kesirinen sol jerde jan tapsyrǵan. Al, qalǵan eki bala da aýrýhanada jatyr.
«Aıaǵyna gıpstep, shoktan shyqqan soń qalǵan balalarmen olarda da mı shaıqalý jaraqaty bolǵan. Tekserilip bolǵan soń oblystyq aýrýhanaǵa GRES-ke jóneltildi» - deıdi Talǵar aýdandyq aýrýhanasynyń travmatolog dárigeri Tóleýbaı Aınabekov.
Qazir otbasy jolǵa jylqy aıdaǵan jylqyshyny izdeýde. Polıseıge aryz da jazyp qoıypty. Oblystyq ishki ister departamenti qylmystyq istiń 345-baby boıynshy tergeý jumystary bastalǵanny aıtty. Al, Begimbetovter áýleti jetinshi synyp oqıtyn qyzdaryn kúni keshe jer qoınyna tapsyrdy. Tek, tuńǵyshyna topyraq ta seýip úlgermegen sheshesine qalaı jetkizerin bilmeı zar ılep qaldy.
