Radıoelektronıka jáne baılanys áskerı-ınjenerlik ınstıtýtynyń oqý ortalyǵynda áskerge mindetti zapastaǵy ofıserlerge arnalǵan bir aılyq jıyn bastaldy.
30 kún boıy 300-ge tarta áskerı mindetti azamat radıotehnıka, baılanys jáne radıonavıgasıa, áýe shabýylyna qarsy qurlyq áskerleri jáne zenıtti zymyrandy áskerler mamandyqtary boıynsha bilim alady.
Jıynnyń maqsaty – beıbit ómirden soǵys ýaqytyna kóshirý barysynda zapastaǵy ofıserlerdiń fýnksıonaldyq mindetterimen tanysý, jaýyngerlik daıyndyǵyn jáne áskerı tapsyrmalardy sapaly oryndaý qabiletin arttyrý.
Oqý kýrsy áskerı ınstıtýttyń bilikti ustazdarynyń qarý-jaraq jáne jarylǵysh zattar, áskerı tehnıkalarmen, sondaı-aq hımıalyq zıandy zattarmen jumys boıynsha dáristerimen bastalyp, alǵashqy medısınalyq kómek kórsetý, dene daıyndyǵy pánderimen jalǵasyn tapty.
Jıynǵa qatysýshy ofıserler ınstıtýt tarapynan jatyn orynmen, áskerı kıimdermen, sondaı-aq azyq-túlikpen tolyqtaı qamtamasyz etilgen.
* Áskerı mindettilerge arnap dalalyq jaǵdaıdaǵy dáris jáne oqý-jattyǵý alańdary arnaıy daıyndaldy. Instıtýtymyzdyń bilikti ofıser-ustazdary kásibı sheberlikterimen bólisip, bilim berýde, - dedi ınstıtýt bastyǵynyń orynbasary polkovnık Murat Oljabaev.
Polkovnık M.Oljabaevtyń aıtýynsha, Úkimet qaýlysymen bekitilgen atalǵan jıynǵa 22-37 jas aralyǵyndaǵy ár salanyń mamandary shaqyrtylǵan. Olardyń qyzmet orny saqtalady, jıynǵa qatysqany úshin eńbekaqy tólenedi.
* Men radıobaılanys mamandyǵy boıynsha daıyndyqtan ótýdemin. Áskerı ant qabyldadym, bul men úshin zor qýanysh. Kúrdeli dalalyq oqý-jattyǵýlarǵa qatysyp, áskerı biliktiligimdi jetildirgenimdi maqtan etemin. Qazaqstan armıasynyń áleýeti arta bersin, - degen tilektemin dedi óz kezeginde «Qazaqstan temir joly» AQ-nyń jetekshi mamany 23 jastaǵy zapastaǵy leıtenant Álibek Shaıahmetov.
Ár demalys saıyn áskerı mindettilerge arnap Radıoelektronıka jáne baılanys áskerı-ınjenerlik ınstıtýtynyń «Baılanys jigitteri» kóńildi tapqyrlar komandasy óz ázilderimen bólisse, elimizdiń óner qaıratkerleri konsert qoıyp keledi. Jıyn aıaqtalǵan soń Almatynyń kórikti jerlerine saıahat josparlanǵan.
