24 qyrkúıekten 25-ine qaraǵan túni NUR.KZ portalynyń tilshisi Irına Beketovany Astanada óltirip ketti. Bul týraly búgin NUR.KZ habarlady. 

Polısıa oqıǵanyń sebepterin anyqtap jatyr. Irına – tórt balany ósirip otyrǵan jalǵyzbasty ana edi. Úlkeni múgedek, odan keıingisi ekinshi synypta oqıdy, keıingi eki balasy úsh jastaǵy egizder. Sonymen qatar Irınanyń jasy qartaıǵan ata-anasy bar.

Qurbylary Irınanyń kóńildi, baýyrmal jan bolǵanyn aıtady. Jańalyqtar portalyna jumysqa ornalasqanyn maqtanyshpen aıtyp júredi eken. Nur.kz portalyna deıin «Qazaqstan temirjolshysy» gazetinde jumys istedi.

«Astana polısıasy 37 jastaǵy jergilikti turǵyndy 34 jastaǵy turǵynnyń óltirgenin anyqtady. Kúdiktini qolǵa túsirý úshin jumystar júrgizilýde. Tıisti ekspertızalar taǵaıyndaldy. Sotqa deıingi tergeý bastaldy», - dep habarlady Astana İİD vedomstvosy.

Nur.kz redaksıasy bolǵan jaıtqa senbeı otyr.

«Qaıǵyly oqıǵaǵa baılanysty áriptesimizdiń týǵan-týystaryna kóńil aıtamyz. NUR.KZ sizdermen birge qaıǵyrady. Óz tarapymyzdan Irınanyń otbasyna materıaldyq kómek kórsetýge daıynbyz», - dedi redaksıanyń dırektory Qýat Bahrıdınov.

Irınamen qoshtasý rásimi  27 qyrkúıek kúni saǵat 10:00-de «Artem» saýda ortalyǵy aýdanyndaǵy meshitte ótedi.

Qamshy.kz aqparat agenttigi marqum Irına Beketovanyń balalary men ata-anasyna jáne týystaryna qaıǵyryp kóńil aıtady.