2018 jyldyń 21 qyrkúıeginde Almaty qalasynda Qazaqstan Respýblıkasy  Bilim jáne ǵylym mınıstrligi Ǵylym komıteti Ahmet Baıtursynuly atyndaǵy Til bilimi ınstıtýty men Halyqaralyq «Qazaq tili» qoǵamynyń  uıymdastyrýymen «Ǵylym ordasynyń» májilis zalynda «Ulttyq termın-jasam ustanymdary: teorıa jáne praktıka» atty semınar-keńes ótti.

Qazaqstan Respýblıkasynyń Prezıdenti N. Nazarbaevtyń«Qazaqstan-2050» Strategıasy: qalyptasqan memlekettiń jańa saıası baǵyty» atty Qazaqstan halqyna Joldaýynda: «Qazaq tiliniń osy zamannyń bıik talabyna saı, baı termınologıalyq qoryn jasaǵan soń ony ret-retimen, kezeń-kezeńimen qoǵamdyq ómirdiń bar salasyna batyl engizýimiz kerek»,–degen kóregendilikpen aıtqan nusqaýy semınar-keńestiń negizgi ustanymy boldy.

Semınar-keńeske salalyq termınologıalyq seksıalardyń músheleri, kórnekti ǵalymdar, qoǵam qaıratkerleri men til janashyrlary jáne gýmanıtarlyq baǵyttaǵy ǵylymı-zertteý ınstıtýttarynyń qyzmetkerleri, jas ǵalymdar jáne  BAQ ókilderi qatysty.

Ártúrli sala mamandary men tilshi-termınolog ǵalymdar jınalǵan semınar-keńesti A. Baıtursynuly atyndaǵy Til bilimi ınstıtýtynyń dırektory, fılologıa ǵylymdarynyń doktory, profesor, Qazaqstan Respýblıkasy Ulttyq ǵylym akademıasynyń korespondent-múshesi, Erden Zadauly Qajybek kirispe sózben ashyp, «Salalyq termınologıalyq seksıalardyń qyzmeti týraly» bas baıandama jasady.

Atalǵan semınar-keńeste bas baıandamadan keıin sóz kezegi qazaq termıniniń negizin qalaýshylardyń biri, kóp jyldar ınstıtýttyń termınologıa bólimin basqarǵan, Halyqaralyq «Qazaq tili» qoǵamynyń prezıdenti, QR UǴA akademıgi, Ahmet Baıtursynuly atyndaǵy Til bilimi ınstıtýtynyń bas ǵylymı qyzmetkeri Ómirzaq Aıtbaıulyna berildi. Akademık «Qazaq termınologıasynyń qalyptasýy, damýy jáne qazirgi máseleleri» atty baıandama jasady. Óz baıandamasyn Ómirzaq Aıtbaıuly «Óz tilimizge ózimiz ıe bolyp, zańdylyqtaryn ózimiz jasaýymyz kerek», - dep qorytyndylady.

Sondaı-aq, ınstıtýttyń bas ǵylymı, jetekshi ǵylymı qyzmetkerleri, fılologıa ǵylymdarynyń doktor, profesorlary baıandamalar jasap, óz usynystaryn talqyǵa saldy. Atap aıtqanda, termınologıa bóliminiń meńgerýshisi Qarlyǵash Aıdarbek «Salalyq termınologıalyq sózdikter toptamasyn jasaý tájirıbesi», Onomastıka bóliminiń meńgerýshisi Qyzdarhan Rysbergen «Onomastıkalyq ataýlardy latyn grafıkasyna kóshirýdiń vedomstvoaralyq úılestirý is-sharalary», Gramatıka bóliminiń meńgerýshisi Orynaı Jubaeva «Shettildik sózderdi tańbalaýdaǵy ustanymdar: HH ǵasyrdyń basy jáne qazirgi kezeń», fılologıa ǵylymdarynyń kandıdattary Baýyrjan Jonkeshov «Termınjasam úderisindegi balamalylyq pen beıbalamalylyq qubylysy», Aıgúl Dosmaıylova «Termınderge qoıylatyn negizgi talaptar men defınıtıvtilik prınsıptiń mańyzdylyǵy» syndy taqyryptarda baıandamalar jasady.

Basqosýǵa shaqyrylǵan salalyq mamandar: Abylaıhan atyndaǵy Qazaq halyqaralyq qatynastar jáne álem tilderi ýnıversıtetiniń profesory Beıbit Isqan «Ulttyq álipbı – shettildik sózderdi ıgerýdiń negizi», Q.I. Sátbaev atyndaǵy Qazaq ulttyq tehnıkalyq zertteý ınstıtýty, Qazaq jáne orys tilderi kafdrasynyń meńgerýshisi, fılologıa ǵylymdarynyń kandıdaty Almas Úderbaev «Geologıalyq termınderdiń oqý sózdigin túzýdegi keıbir máseleler» atty baıandamalaryn oqyp, slaıdtar kórsetti.

Semınar-keńeske belsene qatysqandarǵa Ahmet Baıtursynuly atyndaǵy Til bilimi ınstıtýty men Halyqaralyq «Qazaq tili» qoǵamynyń sertıfıkattary berildi.

Semınar-keńeske qatysýshylar óz oı-pikirlerin bildirdi, birqatar usynystaryn aıtty, sońynda qarar  qabyldandy.

M.A.İlıas