Aqtóbe óńirinde demalys oryndaryn qalpyna keltirilip, jańa demalys caıabaqtar boı kóterýde. Búgingi kúni qalada 66 gúlzar men saıabaq bar. Olardyń 48-i sońǵy úsh jyldyń kóleminde ashyldy.
Barlyq jańa saıabaqtar men gúlzarlardy «Týǵan jerge taǵzym» aksıasynyń aıasynda memlekettik jáne qoǵamdyq uıymdardyń qyzmetkerleri, túrli kásiporyndar men jaı múddeli azamattar jabdyqtaǵanyn aıta ketý kerek. Jobalarǵa sáıkes sporttyq jáne oıyn alańdary ornatylyp, velojoldar tóselip, oryndyqtar qoıylǵan. Mysaly, oblystyq densaýlyq saqtaý basqarmasynyń basshylyǵymen medısınalyq qaýymdastyq Batys-2 turǵyn úı kesheniniń turǵyndaryna «Densaýlyq» saıabaǵyn syılady. Onyń aýmaǵynda 1500-den astam aǵashtar men butalar otyrǵyzylyp, fýtbol alańdary, velosıped joly, ústel tenısi, vorkaýt alańy, sýburqaq ornatylǵan. Bolashaq shaǵyn aýdanynda jańa «Made in Aktobe» gúlzary ashyldy. Aqtóbelik turǵyndar úshin qarjygerler men ekonomıser gúlzarlary jańa demalys oryndaryna aınalyp, «100 teńge» túrindegi sımvolıkalyq arhıtektýralyq nysan qala kórkine kórik qosýda. Sonymen qosa jýyrda shahar taǵy bir saıabaqpen tolyqty. Aqtóbeniń eski bóliginde munaıshylardyń kásibı merekesi kúni «SNPS-Aqtóbemunaıgaz» AQ-nyń óz qarajaty esebinen salynǵan «Dostyq» otbasylyq saıabaǵy ashyldy. 14 gektar aýmaq 220 mln teńgege kóriktendirildi. Balalar oıyn alańdary, voleıbol, basketbol, shaǵyn fýtbol alańdary, ústel tenısi úshin ústelder, trenajerlar, kúrkeler ornatylǵan. «Dostyq» saıabaǵyn kógaldandyrý jáne kóriktendirý jumystary jalǵasýda. Qyrkúıektiń ortasynan bastap munda 300 aǵash otyrǵyzý josparlanyp otyr.
Qosa keteıik, Aqtóbedegi 66 saıabaq pen gúlzarlardyń jalpy aýdany 1,3 mln sharshy metrden asady. Osy jyldyń sońyna deıin taǵy 3 gúlzardy kóriktendirý aıaqtalatyn bolady.
Odan basqa, Aqtóbede bir shaqyrymnan asatyn jaıaý júrginshiler aımaǵy bar óz Arbaty paıda bolady. Onda shaǵyn dúkender, sýburqaq, sýretshiler aleıasy jáne qala turǵyndary men týrıserdiń demalýy úshin jaıly buryshtar ornalasady. Taǵy bir mańyzdy joba — Tuńǵysh Prezıdent saıabaǵynyń keńeıýi. Onyń aıasynda 90 jerde Astana saıabaǵy, etnoaýyl, jaǵalaýdaǵy basty aleıa, ǵashyqtar aleıasy, orman jáne tarıhı aımaqtar, basqa da taqyryptyq demalys aımaǵy salynady. Qazirgi ýaqytta eki joba da iske asyrylýda.
Demalys saıabaqtary men gúlzarlar turǵyndardyń taza aýamen serýendeýine, salaýatty ómir saltyn saqtap, júgirýine mol múmkindik bolyp otyr.
