Elimiz egemendik alǵaly medısına salasy qarqyndy damı bastady. Ásirese joǵary mamandandyrylǵan medısınalyq kómek belsendi túrde damýda. Osydan birneshe jyl buryn shekara asyp jasalyp júrgen kúrdeli otalar óz Otanymyzda da jasalýy osynyń bir aıǵaǵy ispettes. Jaqynda Aqtóbe oblysynda búırek transplantasıalaýdyń kezekti operasıasy júrgizilip, onda naýqastyń óz qaryndasy donor boldy. Osylaısha, ol aǵasyna ekinshi ómir syılady. Bul Aqtóbe óńirindegi elýinshi operasıa bolǵandyqtan, dárigerlerdiń arnaıy esebine alyndy. Sońǵy jyldary aqtóbelik dárigerler búırekti transplantasıalaý boıynsha 38 operasıa, baýyrdy transplantasıalaý boıynsha 12 operasıa jasady.
Aqtóbe oblysynda 2014 jyldan bastap engizilgen organdardy transplantasıalaý baǵdarlamasy tabysty oryndalýda. Osy ýaqyt ishinde organdy transplantasıalaýdyń barlyq máseleleri boıynsha halyqqa kómek kórsetetin barlyq qyzmet quryldy. Aqtóbe medısınalyq klasteri bazasynda búırekti transplantasıalaý boıynsha ózdiginshe operasıalar qazirgi zamanǵy barlyq standarttarǵa sáıkes keledi. Kóp jaǵdaıda naýqastyń týystary donor bolady.
Aqtóbe medısınalyq klasteri transplantasıalaýdy odan ári damytý boıynsha belsendi jumys jasaýda. Basty maqsat — búkil Batys óńiriniń turǵyndary úshin organdardy transplantasıalaýdy júzege asyrý, respýblıkamyzdyń turǵyndarynyń densaýlyǵyn jaqsartý.
Osy oraıda aıta ketsek, Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksine sáıkes densaýlyq saqtaý uıymy máıitten aǵzalardy alý sátinde atalmysh tulǵanyń tiri kezinde nemese onyń jubaıy, zaıyby, jaqyn týystary nemese zańdy ókili onyń tinderi men aǵzalaryn alýǵa kelisim bermese, onda alýǵa bolmaıdy. Basqasha aıtqanda, memlekettiń barlyq azamaty qaza tapqannan keıin donor retinde qaralady, biraq tikeleı kelispegen jaǵdaılardy qospaǵanda. Al adamnyń aǵzalaryn májbúrli túrde alýǵa jáne olardy aýystyryp qondyrýǵa tyıym salynady jáne zań boıynsha qýdalanady. Oǵan sebep, tek bizdiń elimizde emes, álemniń barlyq elinde adamnyń aǵzasyn satyp alýǵa jáne satýǵa zań júzimen tyıym salynǵan bolatyn.
