Aqtóbe qalasyndaǵy №3 Jalpy orta bilim beretin mektepte ınklúzıvti bilim berýdiń resýrstyq kabıneti ashyldy. Soǵan oraı ınklúzıvti bilim berýdi júzege asyrý maqsatynda psıhologıalyq-pedagogıkalyq túzeý kabınetinde alǵash Ashyq esik kúni ótti.
Mekteptegi ınklúzıvti bilim berýdiń resýrstyq kabıneti — tórt aımaqtan turatyn zamanaýı keńistik: ata-analar úshin keńes berý alańy, balanyń relaksasıa aımaǵy, muǵalimder men mamandar úshin toptyq jumys alańy jáne jeke synyptar úshin aımaq. Munda bala ata-analarymen keńes ala alady. Osylaısha, mektep bilim alatyn kez kelgen balany damytý úshin dostyq atmosfera hám jaǵdaı jasaıdy. Resýrstyq kabınettiń jumysy, sonymen qatar, erekshe qajettilikteri bar balalardy mektepke beıimdeýdiń ádisnamalyq tásilderin ázirleýge jáne synaýǵa baǵyttalatyn bolady. Al psıhologıalyq-pedagogıkalyq túzeý kabınetiniń Ashyq esik kúninde erekshe bilimdi qajet etetin balalar men olardyń ata-anasyna jáne BAQ ókilderine jalpy mekemeniń jumysy tanystyryldy.
Túzeý kabıneti balalarǵa jan-jaqty kómek berý úshin barlyq quraldarmen jabdyqtalǵan: ıaǵnı emdik dene tárbıesiniń kesheni, montessorı quraldary, sóıleý jáne estý qabiletin damytýǵa arnalǵan kompúterlik baǵdarlamalar, damytý oıyndary men materıaldar.
Shara aıasynda muǵalimder men ata-analarǵa mamandar erekshe bilimdi qajet etetinderge júrgiziletin jumystarǵa qatysty sheberlik synybyn ótkizdi. Jalpy, ınklúzıvtik bilim berý bilim berý júıesin túrlendirýdiń baǵyttarynyń biri bolyp sanalady, ol sapaly bilimniń barlyǵyna qoljetimdiligin qamtamasyz etýge baǵyttalǵan.
Mamandardyń aıtýynsha, resýrstyq kabınet erekshe qajettilikteri bar balalardy jalpy bilim berý mektepterine beıimdep, olarǵa qolaıly jaǵdaı jasaý úshin qajet. Resssýrstyq ortalyqtyń ashylýyna «Dara» qorynyń bul bastamasyna oblystyq bilim basqarmasy men «Samruk-Kazyna Trust» áleýmettik jobalardy damytý qory qoldaý tanytqan. Inklúzıvti bilim berý áleýmettik beıimdelý jáne ıntegrasıalaý joldary arqyly bilim alýda erekshe qajettilikteri bar balalardy olardyń fızıkalyq, ıntellektýaldyq jáne basqa da erekshelikterine qaramastan jalpy bilim berý ortasyna qosýdy qamtamasyz etedi.Oblystyq bilim basqarmasynyń málimetinshe, óńirde bilim alýda erekshe qajettilikteri bar 5,5 myńnan astam bala turady.
