Aqtóbe oblysynda 57 mektepke deıingi uıymda balalardy elektrondy túrde qabyldaý júıesi engizilse, oblys mektepteriniń 91,7 paıyzynda elektrondy kúndelik pen jýrnal jumys jasap tur.
Óńirde «Elektrondy kolej» pılottyq jobasyn engizý jumystary da bastalǵan. Aqtóbe oblystyq aqparattandyrý jáne syrtqy baılanystar basqarmasynyń basshysy Ermek Kenjehanulyny Aqtóbedegi 44 kolejdiń sıfrlandyrylatynyn aıtty.
— Aqtóbede Smart mektep pılottyq jobasy daıyndalýda. Atalǵan joba qala mektepterine engizilse, ata-analarǵa balalarynyń barlyq qadamdaryn qadaǵalap otyrýlaryna múmkindik týady. Sonymen qatar olar, oqýshylardyń mektepten tys jumystaryn da baqylap otyra alady, — dedi Smart mektepterdiń artyqshylyǵyn aıtqan basqarma basshysy. Jáne ol jobalar tanystyrylymy barysynda oblys mektepterindegi elektrondy júıeni barynsha damytyp, balalarǵa arnaıy biryńǵaı oqýshy kartasyn berýdi josparlap otyrǵandaryn aıtty.
— Bul óte tıimdi ádis. Sol karta arqyly balalar qoǵamdyq kólikterde jolaqysyn tólep, asqanada eseptesetin bolady. Jáne mektepke kirýi de, kitaphana qyzmetin paıdalanýlary da sol arqyly júrgiziledi, — deıdi Ermek Kenjehanuly.
Sondaı-aq ol mektepten tys úıirmelerdiń biryńǵaı júıesi de engiziletindigin habarlady. Al densaýlyq salasy boıynsha Aqtóbe oblysynyń emhanalary 91,3 paıyzy sıfrlandyrylǵan. Jyl aıaǵyna deıin qalǵan 4 medısınalyq mekeme de tolyqtaı jańa júıege kóshiriletin bolady.
— Bul saladaǵy basty maqsat — birneshe jobany bir júıege toǵystyryp, bir jelide aqparat jetkizý. Densaýlyq salasyn sıfrlandyrý emhanalarda kezek kútýdi azaıtyp, adamdardyń qujat tasýyn joıady. Sonymen qatar kelýshiler úshin arnaıy kútý zalyn jasaqtaýǵa múmkindik týdyrady. Taǵy bir aıta ketetin jaıt, bul rette rentgen qorytyndysy da elektrondy túrde jasaqtalyp, olardyń sýretteri saqtalatyn arnaıy biryńǵaı baza qurylady, — dedi ol.
Búgingi tańda oblysta densaýlyq saqtaý salasyndaǵy 121 medısınalyq formanyń 38-i elektrondy túrde júzege asyrylyp jatyr.
Óńirde kólik jáne komýnıkasıa salasyn sıfrlandyrý boıynsha da júıeli jumystar atqarylýda. Búginde qaladaǵy 350 avtobýsta GPS-trekerler ornatylyp, «AktobeBUS» mobıldi qosymshasy iske qosylǵan. Atalǵan qosymshany kez kelgen qoǵamdyq kólikpen júretin qala turǵyny Play marketnemes App Store qosymshalary arqyly júktep alyp, avtobýs baǵyttary men qozǵalystaryn baqylap otyra alady.
— Qazirgi tańda qaladaǵy barlyq qoǵamdyq kólikterde elektrondy tólem júıesi engizilip, qolma-qol tólem jasaý júıesin joıý qarastyrylyp jatyr. Búgingi tańda atalǵan júıe boıynsha Almaty, Astana qalalaryndaǵy qoǵamdyq kólikter jumys jasaýda. Qazir olardyń jobalaryn baqylap, óńir boıynsha ózimiz joba ázirledik, — dedi basqarma basshysy.
