Aqtóbe oblysynda ortasha eńbekaqy 137,7 myń teńgeni qurasa, 2017 jyldyń sońynda 126,1 myń teńge bolatyn. Oblys ortasha eńbekaqyny kóterý qarqyny jaǵynan Qazaqstan óńirleri arasynda kóshbasyndaǵylardyń bestiginde ( tórtinshi orynda).
Bul týraly oblys ákimi Berdibek Saparbaevtyń tóraǵalyǵymen ótken jıynda Aqtóbe oblysynyń eńbek ınspeksıasy basshysynyń mindetin atqarýshy Baýyrjan Orazaev málimdedi.
Jıyn kezinde aqtóbelik kásiporyndardyń óndiristik prosesterdi turaqtandyrý jáne jumysshylardyń eńbek quqyqtaryn qamtamasyz etý týraly memorandýmdardy oryndaý suraqtary qaraldy. Birneshe jyldan beri jergilikti bılik óńirdegi iri jáne orta kásiporyndarmen osyndaı memorandýmdarǵa qol qoıyp keledi. Olardyń oryndalýyn arnaıy qurylǵan top qadaǵalaıdy. Jyl basynan beri oblys boıynsha barlyǵy 4,7 myń memorandýmǵa qol qoıyldy. Solardyń aıasynda kásiporyndar úshin eńbekaqyny, sonyń ishinde óndiris jumysshylarynyń eńbekaqysyn kóterý máselesi dırektıvti mindet bolyp tanyldy.
Atap aıtqanda, bıyl 53 iri kásiporyn men olardyń servıstik kompanıalarynda eńbekaqy 7% -dan 20%-ǵa deıin kóterilgen. Oblystaǵy barlyǵy 518 kásiporyn eńbekaqyny kóterý mindetin aldy.
Oblys ákimi memorandýmdardyń oryndalýyn jáne jumysshylar quqyǵynyń saqtalýyn qatań qadaǵalaýdy tapsyrdy.
— Eńbekaqy azamattardyń áleýmettik kóńil kúıine áser etedi. Bul suraq únemi baqylaýda bolýy kerek. Jumys berýshiler eńbekaqyny jyl saıyn ınflásıa deńgeıinde ındeksteýleri qajet. Eger ınflásıa 4 paıyzdy qurasa, onda jumysshylardyń eńbekaqysy kem degende 4 paıyzǵa ósý kerek, — dep atap ótti Berdibek Saparbaev.
Sondaı-aq, eńbek qatynastaryn zańdastyrýdyń júıeli jumystaryn jalǵastyrý, jumysshylardy negizsiz qysqartýǵa jol bermeý jáne jumystan qysqartylǵandardy mindetti túrde jumysqa ornalastyrý da tapsyryldy.
Budan basqa, jıyn kezinde áleýmettik kásipkerlikti damytýdyń aǵymdaǵy jaǵdaıy qaraldy.
Osy taqyrypty talqylaý kezinde oblys ákimi áleýmettik kásipkerlikti damytýǵa qorlar men halyqaralyq uıymdar bóletin granttyq qarajattardy tartý tájirıbesin keńeıtý qajettigine basa nazar aýdardy.
— Munda jergilikti atqarýshy organdarǵa kómekti «Atameken» óńirlik kásipkerler palatasy kórsetýi tıis. Sondaı-aq, kórshiles óńirlermen kooperasıany kúsheıtý jáne keńeıtý kerek – biz bir birimizben áleýmettik kásipkerlikti damytýdyń oń tájirıbesimen almasa alamyz. Osy baǵytta Orynbormen tabysty jumys istep kelemiz, Tatarstanmen áriptestigimizdiń keleshegi zor, — dedi Berdibek Saparbaev.
Ótken úsh aıdyń ishinde oblys boıynsha túrli áleýmettik-baǵdarlanǵan jobalardy júzege asyrýǵa 200 mln teńgedeı granttyq qarajat aýdaryldy.
