Jýyrda Aqtóbe oblysyna jumys saparymen Tatarstan Respýblıkasynyń delegasıasy keldi. Delegasıa quramyna memlekettik organdardyń, mýnısıpaldy aýdandar men iri agroónerkásiptik kásiporyndardyń basshylary boldy.
Delegattardyń óńirge kelýleriniń negizgi maqsaty — «Aktep» JSHS bazasynda qurylǵan Aqtóbe et klasteriniń jumys jasaý tájirıbesin úırený.
Búginde kásiporyn asyl tuqymdy mal ósirýmen aınalysady, 11 myń iri qara malǵa arnalǵan bordaqylaý alańy men qýaty jylyna 7200 tonnadan asatyn et óńdeý kesheni bar. Qazir bul sharýashylyq oblystyń 350 sharýa qojalyǵymen áriptestik qarym-qatynas ornatty.
Seriktes bolý tabysty keńeıtip, analyq maldy tolyqtyrýǵa jáne mal tuqymyn jaqsartýǵa aýqymdy qarajat tartpaı-aq múmkindik beredi, ózderi shyǵarǵan ettiń únemi ótkizý naryǵy bar, jınalǵan mal azyǵy artyǵymen bolatyn qarapaıym sharýalar úshin tıimdi.
Osy aptanyń seısenbisinde oblys ákimi Berdibek Saparbaev pen QR Aýyl sharýashylyǵy mınıstrliginiń jaýapty hatshysy Asyljan Mamytbekov tatarstandyq delegasıanyń basshysy, Premer-mınıstrdiń orynbasary — TR Aýyl sharýashylyq jáne azyq-túlik mınıstri Marat Ahmetovpen kezdesti.
— Aqtóbe oblysy men Tatarstan respýblıkasy mádenı-gýmanıtarlyq salada tıimdi ózara áreket etedi. Atap aıtqanda, bıyl «Baqytty bala» jobasy aıasynda alǵash ret bizdiń oqýshylar Qazanda demalyp, sıfrlyq tehnologıalar salasynda bilim aldy. Alaıda, biz saýda-ekonomıkalyq saladaǵy qarym-qatynasty da damytýymyz kerek. Bizde áriptestik etýge bolatyn salalar kóp, ásirese, aýyl sharýashylyǵy salasynda, — dep atap ótti Berdibek Saparbaev.
Al óz kezeginde sóz alǵan Marat Ahmetov qazaqstandyq tarapty jyly shyraımen qabyldap, «Aktep» JSHS jumysymen tanysýǵa múmkindik bergenderi úshin alǵysyn bildirdi.
— Máskeýde bizge Qazaqstanda, atap aıtqanda, Aqtóbede et klasterin qurýdaǵy biregeı tájirıbe jóninde aıtqan bolatyn. Seriktesterimizdiń keńesimen biz osynda kelýdi uıǵardyq. Aqtóbe et klasteriniń jaı bıznes joba ǵana emes, salmaqty áleýmettik joba ekenin aıta alamyn. Óıtkeni, klasterdiń jeke óńdeý, bordaqylaý alańdarynan ózge 350 seriktesi — sharýa qojalyǵy bar. Bul joba bizge óte qyzyqty. Endi biz Qazaqstannyń memlekettik qoldaýyn seze otyra dál sondaı jobalardy Tatarstanda da pysyqtaıtyn bolamyz, — dep atap ótti M.Ahmetov.
