Jýyrda Aqtóbe oblysynyń ákimi Berdibek Saparbaev Ázirbaıjan Respýblıkasynyń tótenshe jáne ókiletti elshisi Rashad Mammadovpen kezdesti.

— Bıylǵy jyldyń jeti aıy ishinde Qazaqstan men Ázirbaıjan arasyndaǵy taýaraınalym — 142 mln dollar. Ótken jyldyń sáıkes kezeńimen salystyrǵanda, ósim — 56 paıyz, — dedi ózara saýda-sattyq kólemin ulǵaıtý qajettigin atap ótken dıplomatıalyq ókildik basshysy.

— Qazaqstan — bizdiń bıznes pen ınvestısıamyzdyń qaýipsizdigin qamtamasyz etetin aǵaıyn el. Aqtóbe oblysy bizdi óńiraralyq áriptestikti ári qaraı jalǵastyrý turǵysynan qyzyqtyrady. Qazirgi saparymyzdyń aıasynda óńirdiń eksporttyq áleýeti týraly aqparat alǵymyz keledi, — dedi Rashad Mammadov.

Óz kezeginde oblys ákimi ózara yntymaqtastyq qarym-qatynasty nyǵaıtýda qyzyǵýshylyq tanytatynyn rastady. Berdibek Saparbaev eki el basshylarynyń arqasynda, sonyń ishinde óńirlerde qaryshty damyp kele jatqan Ázirbaıjan men Qazaqstan arasyndaǵy dástúrli jyly ári dostyq qarym-qatynasty erekshe atap ótti.

— Qazaqstan men Ázirbaıjan — aǵaıyn elder. Bizdi ortaq túrki tamyrymyz, ortaq rýhanı muramyz biriktiredi, — dedi oblys ákimi Berdibek Saparbaev.

Elbasymyz Nursultan Nazarbaev atap ótkendeı «qos memleket arasynda burynnan tarıhı jáne mádenı baılanystarǵa negizdelgen dástúrli dostyq sıpatyndaǵy ekijaqty qarym-qatynas qalyptasqan». Jyl ótken saıyn saıası, saýda-ekonomıkalyq jáne mádenı-gýmanıtarlyq baılanystyń damýy da artyp keledi. Qazaqstan men Ázirbaıjan arasynda búginge deıin júzdegen qujatqa qol qoıylyp, ekonomıkalyq yntymaqtastyq jónindegi ortaq parlamentaralyq kommısıasy tabysty jumys atqarýda. Qos memleket arasyndaǵy yntymaqtastyqtyń mańyzdy aspektileriniń biri - tranzıttik áleýet. Máselen, Ázirbaıjan arqyly ótetin Kavkazdyq baǵyt Qazaqstanǵa Eýropalyq naryqqa shyǵýǵa múmkindik beredi. Al Qazaqstan Ázerbaıjanǵa Ortalyq Azıa men Qytaı naryǵyna shyǵýǵa jol ashady.

Qazaqstan Ázirbaıjanǵa temirjol jáne tramvaı lokomotıviniń jabdyqtaryn, qara metal, janar-jaǵarmaı, qurylys materıaldaryn eksporttaıdy. Importtyń negizgi bóligin qant jáne kondıterlik ónimder, qara metaldan jasalǵan ónimder, kókónis pen dánder, tekstıl ónimderi men elektr qural-jabdyqtary quraıdy.

Búginde Aqtóbe oblysy aýmaǵynda Ázirbaıjan kapıtaly qatysatyn 11 kompanıa bar. Negizinde bul — et, jem, astyq ónimderi, sonymen qatar, qala qurylysy men ónerkásiptik qurylysqa mamandandyrylǵan shaǵyn kásipkerlik sýbektileri.