Aqtóbe oblysynyń úsh aýdanynda «Eldik skrınıng» jobasy pılottyq rejimde iske qosyldy.
Arnaýly skrınıng kásipkerliktiń tıimdi tustaryn anyqtap, jańa bıznes-jobalardy qurý jáne qarjylandyrý úshin aımaqtyq damý kartalaryn qalyptastyrýǵa múmkindik beredi. «Atameken» UKP jobalyq tobynyń 88 mamany eki aptadan beri Mártók, Alǵa, Qarǵaly aýdandaryndaǵy úı sharýashylyǵyndaǵylar men bıznes sýbektilerinde saýalnama júrgizip jatyr. Anketadaǵy 29 negizgi suraqqa jaýap bergender turǵyndarǵa naqty ne kerektigin anyqtaýy tıis. Qorytyndysynda skrınıng óńirdiń naqty qajettiligin eskeretin jol kartasyn jasaýǵa jol ashady.
— Aqtóbe oblysynda júzege asyrylyp jatqan skrınıngtiń basqa pılottyq jobalardan basty ereksheligi, skrınıng aıasynda jáne onyń nátıjelerin saraptar tusta IT-sheshimder belsendi qoldanylyp jatyr. Skrınıng qorytyndysy boıynsha, aýdandar men qalalarda ári qaraı jańartylyp otyratyn damý kartalary jasalady, — dep atap ótti Eldar Jumaǵazıev.
Oblys ákimi aýdan ákimi men aýyldyq okrýg basshylaryna jumysty uıymdastyrýǵa jan-jaqty kómek berýdi tapsyrdy.
— Bul — mańyzdy joba. Ol jumyssyzdar men ózin-ózi qamtamasyz etetinderdiń naqty sanyn anyqtap, jańa jumys oryndaryn ashatyn bıznes-jobalardy qurýǵa múmkindik beredi. Biz belgili bir eldi mekende qandaı bıznes jasaýǵa bolatyndyǵyn, óńirge qandaı mamandar qajet ekendigin naqty biletin bolamyz. Jaǵdaıdy dál bilý jergilikti jerlerde memlekettik baǵdarlamalardy júzege asyrýdy jetildirip, turǵyndardyń ál-aýqatyn arttyrý úshin tıimdi sharalardy qabyldaýǵa kómektesedi, — dep tujyrdy oblys ákimi.
Odan bólek, jıyn barysynda S.Seıfýllın atyndaǵy Qazaq agrotehnıkalyq ýnıversıteti agroónerkásiptik kesheniniń sıfrlandyrýǵa qatysty aralyq qorytyndysynyń tanystyrylymy jasaldy. Atalǵan joǵary oqý ornynyń prorektory Qaırat Aıtýǵanov jetistikterge toqtalyp, ǵalymdardyń aýylsharýashylyq salasyn sıfrlandyrýda jaqsy nátıjege qol jetkizgenin atap ótti. Ol nárli zattardyń quramyn anyqtaıtyn jobany tanystyryp, jerdi ǵaryshtan zertteýge qatysty tehnologıaǵa toqtaldy. Bul tehnologıa eginniń jıyn-terininiń naqty kórsetkishin bilýge múmkindik beredi. Barlyq usynylǵan tehnologıa oblys basshylyǵy tarapynan qoldaý tapty.
