Aqtóbe oblysynyń Qarǵaly aýdany Badamsha aýylynda qýattylyǵy 48 MVt bolatyn jalpy somasy 33 mıllıard teńgege jel elektr stansasynyń qurylysy bastalmaq.
Keshen keler jyldyń sońynda paıdalanýǵa beriledi. Bul týraly keshe «SNPS-Aqtóbemunaıgaz» aksıonerlik qoǵamy ǵımaratynda oblys ákimi Berdibek Saparbaevtyń tóraǵalyǵymen «Transulttyq korporasıalar. Jańǵyrtý jáne ınvestısıalyq jobalar» taqyrybynda ótken bıznes-keńeste málim boldy. Bıznes-keńeske «Qazhrom», Ortalyq Azıadaǵy «Sinopek Group», «CNPC» syndy transulttyq korporasıalar jáne óńirdiń basqa da iri kásiporyndarynyń ókilderi, jańa ınovasıalyq jobalardyń bastamashylary, birqatar aýdan ákimderi qatysty.
Oblys ákimi Berdibek Saparbaev jınalǵandarǵa Memleket basshysy Nursultan Nazarbaetyń aldymyzǵa úlken mindet qoıǵanyn, ıaǵnı tórtinshi óndiristik revolúsıany uıymdastyrý, sonyń nátıjesinde Qazaqstan ekonomıkasyn damytý, onyń ishinde, óndiristiń qarqynyn kúsheıtý, ekonomıkalyq kórsetkishti kóbeıtý kerektigin, sonyń esebinen elimizdi damyǵan otyz eldiń qataryna tezirek engizý qajet ekenin atap ótti.
— Elbasy bergen osy tapsyrmany oryndaý maqsatynda sizder men biz ózimizge mindet alǵan bolatynbyz. Esterińizde bolsa, byltyr Úkimet basshysy Baqytjan Saǵyntaevqa 2018-2019 jyldary oblysta qansha kásiporynnyń jańǵyrtylatynyn, oǵan salynatyn qarajat mólsherin, jalpy sizderdiń kómekterińizben óńir ekonomıkasyn qansha paıyzǵa damytatynymyz týrasynda aıtqan bolatynbyz. Biz oblys ekonomıkasynyń damý qarqynyn 5 paıyzdan tómendetpeý týrasynda mindet alǵanbyz. Ol úshin berilgen tapsyrmalardy, ıaǵnı munaı-gaz shyǵarýdy, hrom, tústi metaldardy óndirý kólemin kóbeıtýimiz qajet. Árbir kásiporyn ózine alǵan mindettemesin tolyǵymen oryndaýy tıis. Birinshi jartyjyldyqty 5 paıyz ósimmen aıaqtadyq. Munaı burǵylaý isiniń tómendeýine baılanysty jeti aıdyń qorytyndysy 4,8 paıyz boldy. Qazirgi boljamymyz boıynsha, segiz aıdyń qorytyndysy boıynsha 5 paıyz ósim bolýy kerek, — dedi ol.
Oblys ákiminiń aıtýynsha, ótken jyly aımaqta ınvestısıa kólemi 465 mıllıard teńgeni qurasa, bıyl bul kórsetkishti 530 mıllıard teńgege jetkizý mejelengen. Ótken jeti aıdyń qorytyndysy boıynsha, ınvestısıa kólemi shamamen 260 mıllıard teńgege jetipti. Bul oraıda Berdibek Mashbekuly oblys ekonomıkasyn órkendetýge súbeli úles qosyp otyrǵan «SNPS-Aqtóbemunaı» kásipornynyń qoldaýyn erekshe atady. Búgingi kúni oblys ákimdigi men atalǵan kásiporyn basshylyǵy arasynda ınvestısıa kólemin ótken jyldan tómendetpeý týrasynda kelisim bar.Keńeste oblys ákiminiń orynbasary Qaırat Bekenov óńirdegi óndiristik kásiporyndardyń tehnologıalyq jańǵyrýy týrasynda baıandady. Onyń aıtýynsha, bıyl Aqtóbede 85 mıllıard teńgege 42 kásiporyn jańǵyrtylady.
Kásiporyndardyń jańǵyrtylyp, sıfrlandyrylýy esebinen óńir ekonomıkasynyń damý qarqyny 2 paıyzǵa artpaq. Bıznes ókilderi bas qosqan keńeste «Sinopek Group», «SNPC» transulttyq kompanıalary men «SNPS-Aqtóbemunaıgaz» AQ, «Qazaqtúrikmunaı» JSHS ókilderi kásiporyndy tehnologıalyq jańǵyrtý baǵytynda ári áleýmettik jaýapkershilik aıasynda atqarylyp jatqan jumystar týrasynda aıtty. Sondaı-aq, olar aldaǵy 3-5 jylǵa arnalǵan josparlary týraly da sóz qozǵady.
Búgingi tańda oblysta ónerkásiptiń túrli salalarynda 5 transulttyq korporasıa jumys jasaıdy. Osylaısha bıyldan bastap menshik ıeleri «ENI» (90 paıyz) jáne «General Electric» (10 paıyz) eki iri transulttyq kompanıacy bolyp tabylatyn «Arm Wind» jaýapkershiligi shekteýli seriktestigi ınvestısıalyq jobasymen Aqtóbe naryǵyna kelmek.
