Aqtóbe qalasyndaǵy «Atameken» kásipkerler palatasy alańynda oblys ákiminiń orynbasary Qaırat Bekenovtiń qatysýymen jergilikti taýar óndirýshilerge arnalǵan Ashyq esik kúni ótti. Sharanyń maqsaty — kásiporyndar arasynda ózara áriptestik qarym-qatynas ornatý jáne satyp alýlardaǵy otandyq quram úlesin arttyrý.
Oblystyq ındýstrıalyq-ınnovasıalyq damý basqarmasynyń qoldaýymen ótkizilgen sharaǵa «Vosqod-Oriel» JSHS jáne «AltynEx Company» AQ sekildi óńirdegi iri jer qoınaýyn paıdalanýshy kompanıalar men jergilikti taýar óndirýshiler qatysty. Shara B2B túrinde uıymdastyryldy.
Oblys ákiminiń orynbasary Qaırat Bekenovtiń aıtýynsha, Memleket basshysy N.Nazarbaevtyń otandyq taýar óndirýshilerdi qoldaý, qazaqstandyq mazmundy arttyrý baǵytyndaǵy tapsyrmalaryn oryndaý úshin jer qoınaýyn paıdalanýshy iri kompanıalar men jergilikti taýar óndirýshiler arasyndaǵy yntymaqtastyqty arttyrý qajet.
— Biz ár toqsan saıyn taldaý jasaımyz, ókinishtisi, keıbir iri kompanıalardyń otandyq taýar óndirýshilermen aradaǵy baılanys qarqyny tómen. Osy maqsatta oblys ákimi Berdibek Saparbaev óńirdegi jer qoınaýyn paıdalanýshy iri kásiporyndarǵa jergilikti taýar óndirýshilerdiń basyn qosyp, Ashyq esik kúnin ótkizý týraly usynys aıtqan bolatyn. Qazirgi ýaqytta iri kompanıalar mundaı kezdesýlerdi uıymdastyryp jatyr. Oblystaǵy sondaı iri kásiporyndardyń qatarynda «Vosqod-Oriel» seriktestigi men «AltynEx Company» aksıonerlik qoǵamy da bar, — dedi Q.Bekenov.
Ashyq esik kúni isin jańa bastaǵan kásipkerlerge ótkizý naryǵyn keńeıtýge, keı jaǵdaıda kelisimsharttar jasasýǵa múmkindik beredi. «Atameken» óńirlik kásipkerler palatasy dırektory Nurlybek Muqanovtyń aıtýynsha, oblystyq kásipkerler palatasy 270 jergilikti taýar óndirýshiniń tizimin jasaǵan, sonyń shinde ımport almastyrý jáne óńiraralyq kooperasıany júzege asyrý maqsatynda biregeı taýar óndirýshilerdi bólip qarastyrdy. Buǵan qosa atqarýshy organdarmen birlesip jergilikti úlesti baqylaý boıynsha komısıa qurylǵan.
— Oblystaǵy jer qoınaýyn paıdalanýshy iri kompanıalar jyl saıyn tender ótkizip, satyp alýlar uıymdastyrady. Bizdiń pikirimizshe, tenderdi jyl saıyn uıymdastyrýdyń ornyna jergilikti taýar óndirýshilermen úsh nemese bes jyldyq kelisimsharttar jasaý tıimdirek. Sebebi jyl saıyn satyp alý úshin tender uıymdastyrýǵa kóp ýaqyt, resýrs jumsalady. Al taýar óndirýshilermen 3-5 jylǵa shart jasassa, eki jaqqa da tıimdi bolar edi. Bul jaǵdaıda taýar óndirýshiler jumystaryn tenderden tenderge deıin emes, birden 3-5 jylǵa josparlar edi, — deıdi N.Muqanov.
Kezdesý barysynda «AZPO», «AZAIA» sekildi birneshe jergilikti taýar óndirýshiler tutynýshy kompanıalarǵa óz ónimderin tanystyrdy. «Vosqod-Oriel» jáne «AltynEx Company» kompanıalarynyń basshylyǵyna
otandyq óndiristi damytýǵa qoldaý kórsetý úshin jergilikti taýar óndirýshilerdiń ótinishterin qaraýǵa basymdyq berý týraly usynys aıtyldy.
