Aqtóbe oblysynyń Yrǵyz aýdanynda kempıng pen demalys saıabaǵy turǵyndardyń ıgiligine berildi.
Jol boıyndaǵy «Uly dala» kempıngi Aqtóbe men Aral qalalarynyń ortasynda oryn tepken. Úsh jylǵa sozylǵan qurylys jumystaryna «Altyn Ásel» JSHS 87 mıllıon teńge jumsaǵan. Seriktestik basshysy Hamıt Óteýulynyń aıtýynsha, kempıngte 10 adamǵa shaqtalǵan qonaqúı, 70 adamǵa arnalǵan asqana bar. Ázirge munda 8 adam jumys isteıdi. Aldaǵy ýaqytta bul jerde kólik jóndeıtin ortalyq, basqa da servıstik ortalyqtardy ashý josparlanyp otyr.
— Sizder kempıngti «Uly dala» dep ádemi atapsyzdar. Munda Eýropa men Azıany baılanystyratyn úlken dáliz bar. Onyń 600 shaqyrymy Aqtóbe oblysynyń aýmaǵyna kiredi. Bul jerden kúnine 10-12 myń kólik ótedi. Al júrgizýshiler men jolaýshylarǵa as-aýqat, demalystyń qajet ekeni aıtpasa da túsinikti. Bir sózben aıtqanda, biz jol boıyndaǵy adamdarǵa sapaly qyzmet kórsetýge múddeli bolýymyz kerek. Elbasy Nursultan Nazarbaevtyń ózi jol boıyndaǵy kásipti damytýǵa qatysty tapsyrma bergeni belgili, — dep atap ótti Berdibek Saparbaev.
«Biz úshin bul tabys kózi. Sondyqtan mal sharýashylyǵynan bólek, osy kásip túrimen aınalysýǵa bel býdyq. Sol arqyly ózimizdiń ónimderimizdi de qamtımyz», — dedi Hamıt Óteýuly.
Sondaı-aq «Týǵan jerge taǵzym» aksıasy aıasynda aýdannyń Qaraqudyq aýylynda demalys saıabaǵy ashyldy. Ony da salǵan — «Altyn Ásel» JSHS. Seriktestik bul maqsatta 5 mıllıon teńgeni jumsapty. Eki myń jas kóshet egilip, jan-jaǵy abattandyrylyp hám jaryqtandyrylǵan saıabaqta ana men balaǵa arnalǵan «Arý Ana» eskertkishi turǵyzylǵan.
— Árkimge óziniń týǵan jeri ystyq. Bul — bárimizge ortaq sezim. Ár kelgen saıyn sizderdegi tazalyqty, jaıqala ósip turǵan jas jelekti kórip, kóz súısinedi. Osy oraıda kóp nárse adamdarǵa baılanysty ekeni sózsiz. Bul rette Hamıt Óteýulynyń eńbegin erekshe atap ótken jón. «Týǵan jerge taǵzym» aksıasy aıasynda óziniń týǵan jeriniń kórkeıýine úles qosyp, Qaraqudyq pen Qumtoǵaı aýyldarynda stadıonnyń salynýyna kómektesken osy azamatqa oblys basshylyǵy atynan alǵysymdy aıtamyn, — dedi oblys ákimi Berdibek Saparbaev.
Seriktestiktiń ózi aýyldyqtarǵa jıi kómektesip turady. Atalǵan azamattyń septigimen aýylda ınternat jańartylyp, «Eńbek erleri alańy» men «Bozdaqtar alańy» memorıaldary boı kóterdi. Seriktestik jumysshylaryna arnalǵan birneshe úı salynǵan.
— Hamıt aǵaıdyń járdemin aıtyp jetkizý múmkin emes. Aıtalyq, ol mekteptiń materıaldyq-tehnıkalyq bazasyn jańartyp, ardagerler úıine jıhaz alyp berdi, — dedi Qumtoǵaı aýyldyq okrýginiń ákimi Ál-Farabı Álibekuly.
