Aqtóbe qalasynda qurylys jumystary qarqyndy júrýde. Jýyrda shahardyń 5-shaǵyn aýdanyndaǵy kópir men tórt jolaqty eki aınalma jol ashyldy.
— Kópir jergilikti turǵyndardyń jol qozǵalysy úshin mańyzdy ekeni málim. Osydan bes aı buryn osy jerde qurylys jumystaryn bastaǵan edik. Mine, sol qurylys aıaqtalyp, kópirdi halyq ıgiligine berip otyrmyz. Bul —qalanyń eki aýmaǵyn, ıaǵnı Astana men Almaty aýdandaryn qosatyn aınalma joldary bar birinshi kópir bolǵaly tur. Bul kópir batyr Álıa Moldaǵulovanyń atymen atalatyn bolady. Memleket basshysy Nursultan Nazarbaevtyń tapsyrmasyna saı, Aqtóbe elimizdegi mıllıon turǵyny bar tórtinshi iri aglomerasıalyq ortalyq. Sondyqtan qalamyzda osyndaı ıgi ister jasalýy tıis. Aldaǵy aıda jolaýshylarǵa arnalǵan eki jolústi ótkelderi ashylady,— dedi oblys ákimi Berdibek Saparbaev.
Eki aınalma jol men jaryqtandyrylatyn jerasty jolyn qamtıtyn «Týrgenev kóshesinen Jubanova kóshesine deıingi aralyqty uzartý» jobasynyń jalpy quny — 1 mlrd 232 mln teńge. Qurylys jumystaryn júzege asyrǵan merdiger kompanıa — astanalyq «Progres KZ» JSHS. Atalǵan seriktestik basshysy Bekzat Mýseevtiń aıtýynsha, eki jylǵa arnalǵan jobanyń negizgi jumystary aıaqtaldy.
— Bul óte kúrdeli qurylys boldy. Jumysty maýsym aıynda bastadyq, kópirge qatysty jumystardy 2 aı 20 kúnde aıaqtadyq. Kópir jabylǵan ýaqytta shydamdylyqpen kúte bilgen aqtóbelikterge, qoldaý kórsetken jergilikti ákimdikke, barsha jumysshylarǵa alǵysymdy bildiremin, — deıdi ol. B.Mýseevtiń aıtýynsha, joba aıasynda otyz jyldan astam ýaqyt boıy aýystyrylmaǵan komýnaldyq, sonyń ishinde jylýmen, sýmen qamtý, baılanys jelileri jańartylǵan, elektr jelileri júrgizilip, aýmaq jaryqtandyrylǵan. Aldaǵy ýaqytta tóselgen joldar men adamdar júretin joldy abattandyrý, aınalasyn jaryqtandyrý jumystary jalǵastyrylady.
Jol ótkeliniń saltanatty ashylýyna ardagerler de keldi. Sonyń biri — jol qurylysy salasynda uzaq jyldar jumys istegen osy sala ardageri Baǵlan Baımaǵambetov.
— Bul kópir 1974 jyly salynǵan. Osy kópirdiń astynan tonnel salyp, eki aınalma jol qurylysyn júrgizý óte mańyzdy joba bolyp otyr. Bul jol ótkeliniń ashylýymen qaladaǵy kólik tyǵyny birshama azaıady. Burynǵy kópirmen salystyrǵanda bul jerde kólik nópiri keminde 15-20 paıyzǵa artady. Sebebi osy jol ótkeli arqyly tórt baǵytqa qaraı erkin qozǵalýǵa bolady, — deıdi ol.
Turǵyndardy Aqtóbe qalalyq ardagerler keńesiniń tóraǵasy Ahat Myrzalın de quttyqtady. -Buryn qalada 300 myńdaı turǵyn bolsa, búginde 500 myńnan asyp otyr. Kólik sany 250 myńnan kóp. Sondyqtan bul jerde joldy keńeıtý naǵyz der kezinde qolǵa alyndy, — deıdi ol.
