Búgin Qostanaı oblysyna arnaıy barǵan «Nur Otan» partıasy Tóraǵasynyń Birinshi orynbasary osylaı dedi.
Elbasy óziniń bes áleýmettik bastamasynyń júzege asyrylýyn baqylaýdy «Nur Otan» partıasyna tapsyrǵany belgili. Soǵan oraı partıa respýblıkalyq jáne aımaqtyq qoǵamdyq keńester quryp, júıeli jumys júrgizýde. Osy maqsatta Máýlen Áshimbaev óńirde atqarylyp jatqan jumystarmen tanysý úshin Qostanaı memlekettik pedagogıkalyq ýnıversıtetine bardy. Oqý ordasynyń rektory Erkin Ábil úshinshi «Joǵary bilim alýdyń qoljetimdiligi men sapasyn arttyryp, stýdent jastardyń jataqhanalardaǵy jaǵdaıyn jaqsartý» bastamasynyń ýnıversıtette qalaı júzege asyrylyp jatqany týraly aıtyp berdi. Onyń sózine qaraǵanda, búginde joǵarǵy oqý ornynda 2 804 stýdent bilim alady. Ýnıversıtettiń 465 oryndyq 5 qabatty bir ǵana jataqhanasy bar. Degenmen, taǵy 344 oryn qajet. Osy máseleni sheshý úshin Elbasynyń bes áleýmettik bastamasy aıasynda úsh qabatty, árqaısysy 86 oryndyq 4 ǵımarattan turatyn kampýs salý josparlanyp otyr.
Bes áleýmettik bastama aıasyndaǵy «7-20-25» baǵdarlamasy da Qostanaı oblysynda tabysty júzege asyrylýda. Qazirdiń ózinde birqatar qostanaılyqtar osy bastamanyń nátıjesinde turǵyn úıge qol jetkizip, baspanaly bolýda. Atap aıtqanda, jańadan boı kótergen «Altyn arman» shaǵyn aýdanyndaǵy birneshe kóp qabatty úı «7-20-25» baǵdarlamasy boıynsha berilýde. Máýlen Áshimbaev oblys ákimi Arhımed Muhambetovpen birge osyndaı qýanyshqa kenelgen páter ıelerin quttyqtap, saltanatty kilt tapsyrý rásimine qatysty.
Baspanaly bolǵan otbasylarymen kezdesýde «Nur Otan» partıasy Tóraǵasynyń Birinshi orynbasary bul bastamanyń ýaqytyly qolǵa alynǵanyn atap ótti. Sondaı-aq ol atalǵan baǵdarlamanyń paıyzdyq kórsetkishi men alǵashqy jarnasynyń tómen bolýy páter alýdaǵy eń tıimdi tetik ekenine nazar aýdardy.
– Prezıdenttiń bes áleýmettik bastamasy halyqtyń ál-aýqatyn jaqsartý úshin der kezinde qolǵa alynǵan baǵdarlama. Qazirdiń ózinde elimiz boıynsha turǵyndar bul bastamalardyń naqty nátıjesin kórip otyr. Árıne, barlyq bastamanyń mańyzy joǵary. Degenmen, halyqtyń baspanaly bolýyn qamtamasyz etetin «7-20-25» baǵdarlamasy óte ózekti. Oǵan ótken jyly elimizde 11 mln. sharshy metr úı paıdalanýǵa berilgenimen, baspanaǵa degen suranystyńazaımaýy dálel. Sebebi, árbir qazaqstandyq óz páterine qol jetkizgisi keledi. Sondyqtan da Elbasy osyndaı baǵdarlamany jarıalap, kóp máseleniń túıinin sheship berdi,– dedi Máýlen Áshimbaev.
Sonymen qatar sapar barysynda partıa Tóraǵasynyń Birinshi orynbasary partıanyń «Sokolov-Sarybaı taý-ken baıytý óndiristik birlestigi» AQ» aýdandyq fılıalyna qarasty bastaýysh partıa uıymdarynyń tóraǵalarymen jáne kásiporynnyń eńbek ujymymen kezdesti. Sondaı-aq «Rýhanı jańǵyrý» baǵdarlamasy boıynsha óńirlik jobalaý keńsesinde boldy jáne partıa qyzmetin jańǵyrtý aıasynda qolǵa alynǵan jańa jobalardyń aımaqta júzege asyrylý barysymen tanysty.
