Shymkentke jumys saparymen barǵan memleket basshysy Nursultan Nazarbaev qalanyń áleýmettik-ekonomıkalyq damýy jónindegi keńeste eldiń jalpy jaǵdaıyna toqtalyp, memleket qarjysyn únemdeýdi úırený kerek ekenin eskertti, dep habarlady Qamshy.kz aqparat agenttigi Sputnik Qazaqstannyń deregin negizge alyp.
Nursultan Nazarbaev Shymkentte teatr, sırk syndy mádenı oryndar jeterlik, al keıbir qalalarda mundaı oryndardy tabý qıyn ekenin aıtty. Qala basshylyǵy aldaǵy ýaqytta Shymkenttiń týrızm salasyn damytýdy myqtap qolǵa alý qajettigin atap ótti.
"Qazaqstandy bilmeıtin, biraq kórgisi, kelgisi keletin jurt kóp. Ol úshin temirjol, áýejaı, qoǵamdyq kólik jaǵyn retteý kerek. Shymkent týrıser úshin tartymdy ortalyqqa aınalýy kerek. Halyqaralyq deńgeıde damý qajet… Ózderińiz kórip otyrsyzdar, Ózbekstanmen qazir qarym-qatynasymyz jaqsy. Bıznestegi qarym-qatynasymyz nyǵaıyp keledi. Qalanyń jańa mártebesi qurylys salasynyń damýyna oń áserin tıgizedi degen oıdamyn. Shymkenttiń óz kelbeti, sáýleti bolýy qajet. Shymkentke jeke qala degen ataq berildi. Sondyqtan osy múmkinshiliktiń bárin paıdalanyp, aldaǵy ýaqytta jumys isteý kerek", — degen Elbasy qalada quqyq qorǵaý salasyna qatysty synnyń bar ekenin, tek jumys isteıtinderdiń jalaqysyn arttyrý kerektigin aıtty.
Memleket basshysy eldiń jaǵdaıy týraly oıymen bólisti.
"Biz áli kúnge deıin memleket aqshasyn únemdeýdi úırengenimiz joq. Qalaı bolsa, solaı shashamyz. Eshkim eseptemeıdi… Negizi eldiń jaǵdaıy jaman emes qoı. Qazaq dál qazirgideı eshqashan ómir súrgen joq. Áli de talaı jaqsylyq alda", — dedi memleket basshysy.
Aıta keteıik, memleket basshysy búgin jergilikti bılikpen keńes ótkizbes buryn Shymkent qalasynyń áleýmettik qyzmet kórsetý ortalyǵynda boldy.
"Shymkent" ÁKK tóraǵasy Rashıd Aıýpov úshinshi megapolısti sıfrlandyrý jobalary, máselen, mobıldi qosymsha arqyly dárigerdi úıge shaqyrý, qabyldaýyna esepke turý, "Qaýipsiz qala", "Qoǵamdyq kólik" jobalary týraly baıandama jasady.
Shymkenttegi Áleýmettik qyzmet kórsetý ortalyǵy Astana qalasynyń 20 jyldyǵyna oraı ashylǵan. Onda turǵyndarǵa kásipkerlik, jumyspen qamtý jáne áleýmettik baǵdarlamalar boıynsha qyzmet kórsetiledi.
