QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ jaryqqa shyǵarǵan rejıser Tólegen Baıtókenovtyń túsirgen «Satash» vestern janryndaǵy fılmi bıyl qazannyń 12-i men 21-i aralyǵynda ótetin 34-shi Varshava kınofestıvaliniń «1-2 Competition» atty konkýrstyq baǵdarlamasyna qatysady. Bul baıqaýda álemniń túkpir-túkpirinen kelgen rejıserdiń alǵashqy nemese ekinshi ret túsirgen tolyqmetrajdy kórkem fılmderi kórsetiledi.
«Satash» fılmi týǵan aýylyna basyp kirgen qylmyskerlermen jalǵyz kúreske túsken ýchaskelik polıseı týraly baıandaıdy. Fılmniń basty keıipkeri Satash esimdi aýyldyń ýchaskelik polıseıi aýyl turǵyndaryna kúsh jumsaǵan qylmyskerlerge tótep berip, óziniń boryshyn sońyna deıin óteıdi.
«Bizdiń túsirilim toby túsirgen fılmdi osyndaı beldi kınofestıval tańdap alǵanyna qýanyp otyrmyn. Kartına kórermenderge arnalǵan janrlyq fılm bolyp shyqqan, dese de festıválderge qatysýǵa laıyqty bolyp shyqqany mańyzdy. «Satash» fılmi – meniń alǵashqy tolyqmetrajdy týyndym, sondyqtan da, bul fılmime artyp otyrǵan úlken jaýapkershilikti sezemin. Qazan aıynyń sońynda fılm otandyq prokatqa shyǵady. Otandyq kórermenderdiń kóńilderinen shyǵady dep úmittenemin», - dedi rejıser Tólegen Baıtúkenov.
1985 jyly qurylǵan Varshava kınofestıvali álemge áıgili Kann, Berlın jáne Venesıa kınofestıvalderi sekildi FIAPF (Halyqaralyq kınoprodúserler qaýymdastyǵy federasıasy) tirkeýinen ótken. Festıváldiń maqsaty – álemdik kınematograftaǵy eń jańa ári qyzyqty jobalarymen tanystyrý.
«Bizdiń maqsatymyz, fılmdi «Oskar» júldesin alǵanǵa deıin kórermenge kórsetip, al rejıserdi Kann kınofestıvalinde marapatqa ıe bolǵanǵa deıin tanystyrý. Biz álemge tanylǵan kınogerlerdiń sońynan júgirmeımiz. Mysaly, Mıhael Haneke, Krıstıan Mýndjý, Pavel Pavlıkovskı, Arı Folman, Asgar Farhadı syndy basqa da kınogerler, ataq-dańqqa jetkenge deıin bizdiń festıváldiń qonaqtary bolǵan», - dep atap ótti Warsaw Film Festival festıvaliniń uıymdastyrýshylary.
Sondaı-aq Varshava kınofestıvalinde táýelsiz jáne ınovasıalyq kınolarǵa arnalǵan «Free Spirit», sondaı-aq derekti jáne qysqametrajdy fılmderge arnalǵan konkýrstyq baǵdarlamalar bar. Al konkýrstan tys baǵdarlamalar sheńberinde «Polsha klasıkasy», polshalyq qysqametrajdy fılmder jáne halyqaralyq kınofestıvalderde kórsetilgen álemdik fılmder kórsetiledi.
