Kezdesý "N.Nazarbaev: dáýir,tulǵa,qoǵam" kóshpeli qor kórmesi jobasy aıasynda ótti.
Búgin H.Dosmuxamedov atyndaǵy Atyraý memlekettik ýnıversıtetinde stýdentterge arnalǵan Qazaqstan Respýblıkasynyń tuńǵysh prezıdenti - Elbasy kitapxanasynyń - "Rýxanı jańǵyrý : Bolashaqqa bastar jol" semınar-trenıngi ótti. Semınar barysynda QR prezıdenti keńsesiniń basshysy Maxmud Qasymbekov óz sózinde kórme týyndylary týraly baıandady.
-Atyraýǵa kelgen issapar barysynda eń aldymen Elbasynyń ómir joly týraly kitaptardy tabystaýdy jón kórdim. Bul kitaptarda prezıdentimiz, onyń ómirbaıany, sondaı-aq prezıdenttik joly týraly derekter bar. Osy derekterdi oqý úrdisine paıdalanýdy usynamyn. Jastarymyz el men Elbasy tarıxynan xabardar bolýy kerek,- deıdi Maxmud Qasymbekov.
Semınarǵa oblys ákimi Nurlan Noǵaev ta qatysyp, jergilikti atqarýshy organdar turǵyndardyń kórme jádigerlerimen tanysýyna barlyq jaǵdaıdy jasaıdy dep sendirdi. 
-Barsha atyraýlyqtar atynan Maxmud Bazarqululyna rızashylyǵymyzdy bildirgim keledi. Sebebi, búgin uıymdastyrylyp otyrǵan kezdesý sizderge Elbasyny jańa qyrynan tanýǵa múmkindik beredi. Semınar kezinde tanystyrylǵan týyndylardy oqý úrdisine qoldaný ıdeıasyna tolyqqandy kelisemin. Óz tarapymyzdan kórmeniń joǵary deńgeıde ótýine barlyq jaǵdaı jasaımyz,- deıdi óńir basshysy.

Kezdesý barysynda Maxmud Qasymbekov H.Dosmuhamedov atyndaǵy Atyraý memlekettik ýnıversıtetinde qurylǵan «I Space» kovorkıng ortalyǵynda boldy. Ortalyqta stýdentter zamanaýı ınfraqurylymdy damytyp, jańa jobalardy, kásipkerlik ıdeıalaryn júzege asyryp, aǵylshyn tilin úırene alady.
Aıta keteıik, búgin 18 qyrkúıek kúni Atyraýda " N.Nazarbaev: dáýir, tulǵa, qoǵam" Elbasynyń kóshpeli qor kórmesiniń ashylý saltanaty ótti. Kórmeni Sh.Sarıev atyndaǵy oblystyq murajaıda 2 aı kóleminde tegin tamashalaýǵa bolady.