Atyraý óńirine jumys sapary aıasynda «Nur Otan» partıasy Tóraǵasynyń birinshi orynbasary Máýlen Áshimbaev saıası uıymnyń jergilikti aktıvimen kezdesti. «Rýhanı jańǵyrý», «Prezıdenttiń bes áleýmettik bastamasy», «Sıfrly Qazaqstan» baǵdarlamalarynyń munaıly óńirde júzege asyrylý barysy talqylanǵan jıynda Máýlen Áshimbaev partıanyń aldynda jańa mindetter turǵanyn atap aıtty.
Elbasy tapsyrmasyna sáıkes, «Nur Otan» partıasy tarapynan «Prezıdenttiń bes áleýmettik bastamasyn» iske asyrýǵa qoǵamdyq baqylaýdy uıymdastyrý maqsatynda ortalyq jáne óńirlik deńgeıde Qoǵamdyq keńester qurylǵan bolatyn. Qoǵamdyq keńestiń quramynda jetekshi saıası partıalardyń, Qazaqstan halqy Assambleıasynyń, Qazaqstan kásipodaqtar federasıasynyń, «Atameken» ulttyq kásipkerleriniń jáne óńirlik palatalarynyń, úshinshi sektor ókilderi, tanymal blogerler, salalyq sarapshylar men ǵalymdar bar. Bul partıanyń jańasha formatty qolǵa alǵanyn kórsetedi. Endeshe, partıa músheleri qandaı mindetter jolynda birigýi tıis?
Birinshiden, partıa qazirgi kezeńdegi strategıalyq mısıany naqtylaýy kerek. Iaǵnı, partıa memlekettiń ekonomıkalyq, rýhanı, áleýmettik saıasatynyń oryndalý barysyn qadaǵalaıdy. «Úshinshi ónerkásiptik jańǵyrý prosesine atsalysý – bizdiń basty mindetimiz. Osy rette, partıa tyń ıdeıalar usynysynyń ózegine aınalýy tıis» dep atap ótti «Nur Otan» partıasy Tóraǵasynyń birinshi orynbasary Máýlen Áshimbaev.
Ekinshiden, partıany naqty jumystar alańyna aınaldyrý. «Aldaǵy úsh jylda el kóleminde 1000 İT synyp ashý josparlanyp otyr. Partıa tikeleı muryndyq bolyp otyrǵan bul synyptar dástúrli ınformatıka pániniń oqý baǵdarlamasyna uqsamaýy tıis. Qazirgi tańda elimizde 383 İT synyp ashyldy. Onyń 10-y Atyraý oblysynda. Respýblıka boıynsha 17 İT ortalyq jumys istep tur. Bul ortalyqtar azamattardyń sıfrlyq saýattylyǵyn arttyrýǵa jasalǵan úlken múmkindik» degen spıker Máýlen Áshimbaev partıa fılıaldarynyń jumysy ótkizilgen shara sanymen emes, halyqqa tıgizgen naqty paıdasyna qaraı baǵalanatynyn aıtty.
Úshinshiden, kásibı kadrlar rezervin jasaqtaý. Spıker Máýlen Áshimbaevtyń aıtýynsha, jaýapty saıası qyzmetke úmitkerler endi kásibı kadrlar rezervinen alynady. Bul – partıa quramyna ótý endi kúrdeli irikteý kezeńinen keıin ǵana júzege asyrylady degen sóz.
Tórtinshiden, qoǵamda oryn alyp jatqan jaǵdaılarǵa monıtorıń júrgizý, ahýaldy saralaý.Partıa áleýmettik jelilerdegi aqparattardy saralaı otyryp, qoǵamdyq deńgeıde alańdaýshylyq týǵyzǵan máselelerdiń oń sheshilýine yqpal etetin bolady. «Osyndaı monıtorıń nátıjesinde partıa dıabet dertine shaldyqqan balalardy tolyqtaı dári-dármekpen qamtýǵa, menıngıt dertimen kúresýge tıisti sharalar qabyldaýǵa qol jetkizdi» dep atap ótti «Nur Otan» partıasy Tóraǵasynyń birinshi orynbasary Máýlen Áshimbaev.
Munaıly aımaqtyń basshysy, «Nur Otan» partıasy Atyraý oblystyq fılıalynyńtóraǵasy Nurlan Noǵaev «Prezıdenttiń bes áleýmettik bastamasy» baǵdarlamasy aıasynda atqarylyp jatqan jumystar jóninde aqparat berdi. «Bilim alýdyń qoljetimdiligin qamtamasyz etý maqsatynda, qajetti mamandarǵa jergilikti búdjetten grant bólý dástúrli úrdiske aınaldy. Stýdentterdi jataqhanamen qamtý máselesi sheshilýde. Qazirgi tańda oblys turǵyndarynyń 98 paıyzy «kógildir otynnyń» ıgiligin kórip otyr. Al, oblys ortalyǵynan shalǵaıda ornalasqan Qurmanǵazy aýdanyna qarasty Azǵyr aımaǵyna gaz tartý jumystary júrýde. Keler jyldyń birinshi toqsanynda Azǵyrǵa qarasty segiz eldi mekenge gaz jetkizý múmkindigi bar. Sondaı-aq, tabysy tómen 65 myń atyraýlyq salyqty tómendetý múmkindigin paıdalana alady» dep atap ótti oblys ákimi Nurlan Noǵaev.
Atyraýǵa sapary aıasynda «Nur Otan» partıasy Tóraǵasynyń birinshi orynbasary Máýlen Áshimbaev Atyraý mýzyka koleji «D.Nurpeıisova atyndaǵy halyqtyq mýzyka akademıasynyń» jataqhanasymen, «CaspiyLanaAtyrau» jeńil ónerkásibiniń jumysymen tanysty.
