Oblystyq kásipkerlik jáne ındýstrıalyq-ınnovasıalyq damý basqarmasy Elbasynyń etnoaýyldardy damytý jónindegi tapsyrmasyna oraı ıgi sharalar legin qolǵa aldy. Sonyń aıasynda jaqynda Saraıshyq aýylynda qysh qumyra jasaýdan sheberlik sabaǵyn uıymdastyrdy.

Jergilikti kásipker Sara Sársembaeva az qamtylǵan otbasylar balalary men úlgerimi jaqsy otyz oqýshyǵa Qazynatal ýchaskesinen on kıiz úı tigip, taǵamnan dám úlestirdi. Sharanyń mazmundy ótýine aýyldyq okrýg ákimshiligi men Q.Qarashauly atyndaǵy mektep ujymy qoldaý bildirdi. Maqsat – kóneniń kózine aınalǵan jádigerlerdi jastarǵa nasıhattaý, týǵan ólke tarıhyn tanytý.

Sheberlik sabaǵyn júrgizýge Qyzylqoǵa aýdanynan qysh qumyra jasaý isiniń sheberi Jaılaý Talasov shaqyryldy. Ol oqýshylarǵa umytylýǵa aınalǵan saz syrnaı jasaýdyń qyr-syryn kórsetti.

– Turmystyq buıymdardyń kóbisi qazir hımıalyq qospa arqyly jasalady. Al, bul – densaýlyqqa zıan. Sondyqtan ulttyq qolónerdi qaıta jań-ǵyrtýymyz qajet. Búginde «keramıka», «farfor» dep júrgenimizdiń báriniń de quramy – saz. Ony 700 gradýs temperatýrada kúıdirip, qarapaıym jáne kúrdeli zattar jasalady. Máselen, eýropalyq úılerdiń shatyry kóbinese qyzyl tústi bolyp keledi. Sebebi, ol taza keramıkadan jasalǵan. Áıtse de, onyń baǵasy óte qymbat. Esesine, tabıǵı taza nárseden eshqandaı radıasıa taramaıdy.

Biz burynǵy kıiz ben tekemetti tárk etip, sıntetıkalyq ónimdi paıdalanǵandy qup kóremiz. Bul – durys emes. Jastar arasynda aýrý túrleriniń kóbeıip ketýi de sondyqtan. Máselen, qarapaıym kıiz úıdiń ózi – bizdiń eń baı muramyz. Onda teris energıa saqtalatyn burysh bolmaǵandyqtan, ol sheńber boıymen syrt aınalyp ketedi, – deıdi sheber.

Sheberlik sabaǵy barysynda balalar qumyranyń qalaı jasalatynyn ǵana tamashalap qoımaı, ulttyq oıyndar men sporttyq saıystardan synǵa tústi.