2018 jyldyń mamyr men tamyz aılarynyń aralyǵynda aqparattyq keńistikte 7-20-25 baǵdarlamasy 28 487 ret atalǵan. Bul týraly, ranking.kz daıyndaǵan medıa-saraptama negizinde Baspana Ipotekalyq uıymynyń Syrtqy komýnıkasıalar qyzmeti málimdedi.

Qazaqstandyqtar 7-20-25 týraly kóbine áleýmettik jelilerde jazǵan. Áleýmettik jelilerdiń úlesi 83,3% qurasa, BAQ úlesi 12,9%, messendjerler – 2,75%, blog pen forýmdar shamamen 1%-dy quraǵan.

Sońǵy aıdyń kórsetkishi boıynsha 7-20-25 «Nurly jer» baǵdarlamasynan 8 ret kóbirek atalǵan.

Sonymen qatar, ranking.kz sarapshylary qazaqstandyqtardy 7-20-25 baǵdarlamasy aıasynda kóbirek tolǵandyratyn taqyryptardy anyqtady. Oǵan alǵashqy jarnany jınaý, úı tabý, tólemqabilettiligin rastaý boıynsha qıyndyqtar kiredi. Sonymen birge, otandastarymyzdyń birazy qoldanysta bolǵan eski úılerdi baǵdarlamaǵa engizý boıynsha usynystaryn bildirgen.

Bul jaǵdaıda, «Baspana» Ipotekalyq uıymynyń ákimdikter men «Nur Otan» partıasymen birlesip qolǵa alǵan sharalary kópshiliktiń oıynan dóp shyqqanyn aıta ketý kerek.

Mysaly, alǵashqy jarnany 10 paıyzǵa arzandatý maqsatynda "Jas arman" men "Qamqor baspana" ónimderi ázirlenip, olar Shymkent pen Aqtóbede jumys isteı bastady. Aımaqtardaǵy qurylys qarqynyn jandandyrýǵa 150 mlrd tenge bólinip, qoldanysta bolǵan úılerge ıpotekalyq nesıe berý maqsatynda jyldyq stavkasy 10,75 paıyzdy quraıtyn «Baspana Hıt» ónimi ázirlendi.

«Biz qazaqstandyqtardyń kóńil-kúıin jiti baqylap, qandaı da bir ótinishter men aryzdar boıynsha der kezinde shara qoldanyp kelemiz. Sonyń nátıjesinde, azamattar 7-20-25 baǵdarlamasynyń oryndalý barysyna oń baǵa berýde», - dedi, «Baspana» Ipotekalyq uıymynyń basshysy Qaırat Altynbekov.

Medıa-saraptama boıynsha 7-20-25 baǵdarlamasyna qatysty synı aqparattar úlesi 7 paıyzdan aspaǵan. Al ortaq eseppen bir aıda baǵdarlama týraly aqparatpen 2,5 mıllıon azamat qamtylǵan.

Aıta keteıik, bankter bıyl shilde aıynan bastap «7-20-25» baǵdarlamasy boıynsha ıpotekalyq nesıe berýdi bastap ketti. Al jeńildetilgen ıpotekany kimder ala alady? Bul saýalǵa QR Ulttyq bank tóraǵasy Danıar Aqyshev jaýap berdi. Aıtýynsha, ıpotekalyq baǵdarlamaǵa turaqty jumys bar kez kelgen adam qatysa alady. Alaıda ol azamattyń atynda baspana bolmaýy tıis. Jáne nesıe tarıhy da durys bolýy kerek. Budan buryn Elbasy «7-20-25» baǵdarlamasyn júzege asyrý úshin Ulttyq bank pen Úkimet birlesip jumys isteý kerek.

«Ulttyq banktiń, ekinshi deńgeıli bankter men qor naryǵynyń múmkindikterin iske qosý kerek. Ulttyq bank keminde 1 trıllıon teńge qarjyny tartatyn arnaıy kompanıa quryp, ony bankterdiń joǵaryda aıtylǵan sharttaryna jaýap beretin jańa ıpotekalyq nesıelerin satyp alýǵa jumsaýy qajet. Baǵdarlamany júzege asyrý nátıjesinde mıllıon qazaqstandyq baspana alý múmkindigine ıe bolady», – degen edi Nursultan Nazarbaev.

Buǵan deıin «Baspana» Ipotekalyq uıymynyń» basqarma tóraǵasy Qaırat Altynbekov «7-20-25» baǵdarlamasyna qyzyǵýshylyq tanytqandardyń sany kún sanap artyp keletinin málimdegen. Qyrkúıektiń basyndaǵy statısıkaǵa sáıkes, baǵdarlama aıasynda 27 mıllıard teńgegeg ótinish qabyldanǵan. Sonymen qatar uıym basshysy jańa baǵdarlamaǵa belsendi qatysyp jatqan óńirlerdi de atady. Aıtýynsha, Almaty, Astana qalalary men Mańǵystaý oblysy «7-20-25» boıynsha kósh bastap tur.

«Turǵyndar arasynda da qyzyǵýshylyq artqan. Bank-seriktesterimizge suraý salyp, bilgisi keletin jandardyń sany kún sanap artyp keledi. Alaıda baǵdarlamanyń basty talaptary bárine málim. Alǵashqy jarna 20 paıyz, jyldyq mólsherleme 7 paıyz, nesıeniń eń uzaq merzimi 25 jylǵa deıin», - dep túsindirip ótken edi Qaırat Altynbekov.