1 qazanda «Dımash» atty onlaın-dúkenniń taýarlaryn turǵyndarǵa jetkizý maqsatynda Qanat Aıtpaev pen «Qazposhta» AQ basqarma tóraǵasy Sáken Sársenov arasynda kelisim jasaldy. Bul týraly «Qazposhta» AQ basqarma tóraǵasy Sáken Sársenov óziniń Facebook paraqshasynda jazdy.
«Belgili ártis, Dımash Qudaıbergenniń ákesi, Qanat Aıtbaevpen kezdesý ótkizdik. Ózderińiz biletindeı, byltyrdan beri Dımash Qazposhtanyń kelbeti, bıyl da osy seriktestigimizdi jalǵastyrýǵa kelistik», – deıdi S. Sarsenov.
Onyń aıtýynsha, Qazposhta «Dımash» atty ınternet-dúkenniń jumysyn alǵa bastyryp taýarlaryn klıentterge jetkizýge kómek kórsetetin bolady. Qazir olar sháı jáne kıim toptamasyn shyǵaryp jatyr, aldaǵy kezde dúkende Dımashtyń shyǵarmashylyǵyna arnalǵan sývenırler de satylatyn bolady.
«Dımash Qudaıbergen - bul brend, álemdik deńgeıdegi juldyz, bizdiń elimizdi álemdik sahnada tanytyp júrgen tulǵa. Ol Qazaqstanda da, shetelde de elektrondyq komersıanyń damýyna zor úlesin qosatynyna senimdimin», – dep túıindedi Basqarma tóraǵasy.
Al áleýmettik jeli qoldanýshylary bolsa dúken usynyp jatqan shaıdyń dámdi ekenin, ekijaqty seriktestikke rıza ekendikterin jetkizýde.
«Alaqaı! Dımashtyń esimi jazylǵan kúmis alqany satyp alǵym keledi. Sývenırlik taýarlaryn da alǵym keledi. Shaıy óte dámdi, sapasy da jaqsy», – dep jeli qoldanýshylary óz pikirlerin bildirdi.
Tanymal ánshi bolsa otandyq poshta jelisiniń qazirgi qyzmetine rıza ekendigin birneshe kún buryn jetkizgen bolatyn.
«Sońǵy kezde men álemniń túkpir-túkpirinen hattar men syılyqtar alamyn. Men elimizdiń poshtasynyń qyzmet kórsetý deńgeıi men damý qarqynyna shyn peıilimmen qaıran qalamyn. Árıne, Qazposhta áleýmettik kompanıa, ol qazaqstandyqtardyń, tipti eń shalǵaı aýyldarda poshtalyq jáne qarjylyq qyzmetterdi alýǵa múmkindik beredi, osylaısha elimizdiń barlyq óńirlerin biriktiredi. Onyń áleýmettik róli jáne sonymen birge zamanaýılyǵy men tehnologıalylyǵy maǵan unaıdy. Men Qazposhtanyń odan ári kórkeıip, gúldene berýin tileımin», — dedi ol.
Eske sala keteıik, byltyrǵy jyldyń qazanynda ulttyq poshta operatory men talantty óner ıesi Dımash Qudaıbergenniń arasynda ózara kelisim jasalǵany týraly habarlanǵan bolatyn. Dımash Qudaıbergenov — Vıtebsk qalasynda ótken «Slavánskıı bazar-2015» saıysynyń gran-prı júldesiniń jáne Music Awards premıasynyń «Azıadaǵy eń tanymal ánshi» nomınasıasynyń ıegeri. Qazaqstandyq ánshini Qytaıda ótken I am a Singer-2017 saıysynda ekinshi oryn alyp, dúnıe júzine tanymal boldy.
