Búgin Islamic Finance Week aıasynda ıslamdyq qarjylandyrýdyń sheberleri óz oılarymen bólisti. Olardyń ishinde sheıx Bılil Han da bar. Búginde ol álem boıynsha ıslamdyq qarjylandyrý boıynsha úzdik mamandardyń ondyǵyna kiredi. «Astana» Halyqaralyq qarjy ortylyǵy ony ıslamdyq qarjylandyrý jónindegi konsýltatıvtik keńeske, sondaı-aq, Halyqaralyq arbıtraj ortalyǵynyń basqarmasy quramyna alyp otyr, dep xabarlaıdy Qamshy.kz aqparat agenttigi QazAqparatqa silteme jasaı otyryp.
«Árıne, eń bastysy, ıslamdyq qarjylandyrý salasyndaǵy shárıǵattyń rólin durys túsiný kerek. Bul - óte mańyzdy shart. Kez kelgen tranzaksıanyń qujattary ǵana emes, ishki qurylymy da shárıǵatqa saı kele me, joq pa, osyny jan-jaqty zerdelep otyrý qajet. Áıtpese, kóbisi texnıkalyq qujattarǵa ǵana qaraıdy. Al onyń astarynda ne bar? Soǵan kóp mán bere bermeıdi. Kez kelgen qujattyń astyrynda naqty bir maqsat bolady. Sony taba bilýimiz kerek. Al qujatta jazylǵan máselelerdiń bári biryńǵaı áleýmettik-ekonomıkalyq maqsatpen úndesip turý qajet. Bálkim, qujatta bári durys jazylady. Alaıda onda ıslamdyq qarjylandyrýdyń ıdeıasy bolmaýy da múmkin. Al ıslamdyq qarjylandyrýdyń basty maqsaty - áleýmettik-ekonomıkalyq teńdik, ádilettilik. Múmkindigi kóp adamdar múmkindigi az adamdarǵa kósmektesýi kerek. Ol da - negizgi sharttardyń biri», - deıdi sheıx Bılál Han.
Onyń aıtýynsha, ıslamdyq qarjylandyrýda bárin bir adamǵa arta salýǵa bolmaıdy. Barlyq táýekelder men tabystar teń bólinýi kerek.
«Máselen, bank ıpoteka berse, óz tabysyn oılap qana qoımaı, qaryz alǵan adamnyń jaǵdaıyn da oılaýy qajet. Áıtpese, qarjy ınstıtýttarynyń kóbisi tek aqsha jaǵyn ǵana oılaıdy. Islamdyq qarjylandyrý boıynsha barlyq táýekelder men tabystar teń bólinýi kerek. Iá, bank óz ónimderin arab tilinde atap, ıslamdyq qarjylandyrý retinde usynýy múmkin. Biraq táýekelder teń bólinbese, ony ıslamdyq qarjylandyrý dep ataýǵa bolmaıdy. Ashyǵyn aıtý kerek, búginde adamdar dástúrli qarjylandyrýdan sharshady. Sebebi qazirgi bank júıesinde spekýlátıvti áreketter kóp. Aqsha aınalyp turady. Biraq onyń astarynda aktıv joq. Al ıslamdyq qarjylandyrýda xalyqtyń ál-aýqatyna basa nazar aýdarylady. Jaýapkershilik te qatty», - dep atap kórsetti sheıx Bılál Han.
Aıta keteıik, Astana ıslamdyq qarjylandyrýǵa arnalǵan «Islamic Finance Week» sharasy ótýde. Aptalyq 10 qazanǵa deıin jalǵasady. Sonyń aıasynda ıslamdyq qarjylandarýǵa arnalǵan san alýan sharalar - semınarlar, oqytý kýrstary men dárister ótip jatyr. Negizgi maqsat - ıslamdyq qarjylandyrýdyń mán-mańyzyn túsindirý, osy salada bilikti mamandardy daıarlaý. Aptalyqtyń uıymdastyrýshysy - «Astana» Halyqaralyq qarjy ortalyǵy.
