«Azamattarǵa arnalǵan úkimet» memlekettik korporasıasy QR İshki ister mınıstrligimen birlesip Almaty qalasynda mıgrasıalyq halyqqa qyzmet kórsetý ortalyǵyn ashty.
Qalada jyldyń basynan beri mıgrasıa baǵyty boıynsha 50 myńnan asa qyzmet kórsetilgen. Endi eńbek mıgranttary memlekettik qyzmetterdi halyqqa qyzmet kórsetý ortalyqtarynyń standartyna saı «bir tereze» qaǵıdaty boıynsha ala alady.
Bul - elimizdegi kóshi-qon qyzmetterin kórsetetin úshinshi ortalyq, alǵashqysy osy jyldyń basynda Astanada, ekinshisi shilde aıynda Shymkentte ashylǵan bolatyn.
Buryn sheteldikter jumys isteýge ruqsat alý úshin qajetti qujattaryn rásimdep, birneshe kún júretin. JSN alyp, salyq máselesin sheship, medısınalyq tekseristen, daktıloskopıadan ótip, saqtandyrý anyqtamasyna qol jetkizý úshin birneshe mekemeni aralaýǵa májbúr edi. Endi sheteldikter qujattardy bir jerde, bir saǵattyń ishinde rásimdeý múmkindigine ıe boldy.
«Mıgrasıalyq HQO-da shetel azamattary memlekettik qyzmetterdi belgilengen ýaqyt ishinde reglamentke saı bıznes úrdis jáne elektrondyq kezek arqyly arnaıy jabdyqtalǵan jumys oryndarynda ala alady. Bul mıgranttar úshin ǵana emes, jumys berýshi úshin de óte qolaıly. Jańa mıgrasıalyq HQO jumys barysyn jeńildetip qana qoımaı, sybaılas jemqorlyq áreketteriniń aldyn-alýǵa jol ashady», - deıdi «Azamattarǵa arnalǵan úkimet» memlekettik korporasıasynyń Almaty qalasy boıynsha fılıalynyń dırektory Ǵalym Qarqynbaev.
Jańa front-keńse Alǵabas-1 yqshamaýdany, «Atletıkalyq qalashyqta» aýdany 576 sharshy metr, zamanaýı ǵımarattyń ekinshi qabatynda ornalasqan. Ortalyqta memlekettik korporasıanyń 31 mamany tańǵy saǵat 09.00-den keshki saǵat 18.30-ǵa deıin, túski úzilissiz, kúnine shamamen 1,5 myńdaı azamatqa qyzmet kórsetedi.
Aǵymdaǵy jyldyń qańtar aıynda QR Úkimetinde ótken baspasóz qyzmetinde «Azamattarǵa arnalǵan úkimet» memlekettik korporasıasynyń basshysy Abylaıhan Ospanov «Azamattarǵa arnalǵan úkimet» memlekettik korporasıasy bıyl shaharda biryńǵaı Kóshi-qon máselesimen aınalysatyn Halyqqa qyzmet kórsetý ortalyǵyn (HQKO) ashatyn bolady dep málemdegen bolatyn.
Sonyń ózinde mundaı HQKO qazirdiń ózinde elordamyz Astanada ashylyp úlgergen. Endigi jerde ondaı ortalyqty Almatyda ise qosyldy.
Osyny atap ótken A.Ospanov odan ári óz sózinde «Endigi jerde kóshi-qon polısıasy atqaratyn barlyq jumystar osy Kóshi-qon HQKO-nan ótetin bolady. Osy rette biz bul qyzmetti aldyn-ala ońtaılandyrý maqsatynda tereń taldap-tarazyladyq. Bul jumystar aldaǵy ýaqytta Qazaqstan aýmaǵynda sheteldik azamattardyń túrli jaǵdaımen bolýyn aıtarlyqtaı jeńildetpekshi. Osyǵan baılanysty, buryn shet el azamatynan elimizde jumys isteýge ruqsat alý úshin – aldymen JSN, salyq ótinishi, saqtandyrý sekildi túrli qyzmetterden túrli qujattar talap etiletin bolsa, endigi jerde mamandandyrylǵan HQKO-nyń arqasynda onyń bárin «bir tereze» qaǵıdatymen júzege asyratyn bolamyz», – degen edi.
Nátıjesinde, Qazaqstanǵa túrli máselelermen kelgen sheteldikter elimizde óz qalaýymen emin-erkin júre alatyn bolady.
