Qazaqstan halqynyń tilderi kúni merekesine oraı Taldyqorǵanda «Til – birliktiń besigi» atty oblystyq forým ótti.
Shara barysynda óńirdegi «2011-2019 jyldarǵa arnalǵan memlekettik tildiń qoldanylý jáne damytý aıasyn keńeıtý» memlekettik baǵdarlamasyna sáıkes, til aılyǵy aıasynda ótken túrli baıqaýlar qorytyndylanyp, jeńimpazdary marapattaldy.
«Til – birliktiń besigi» atty oblystyq forýmdy Aqsý aýdanyndaǵy Aqsý halyq teatrynyń ártisteri teatrlandyrylǵan qoıylymmen ashyp berdi. Onda ushqan qustyń qanaty talyp, júgirgen ańnyń tuıaǵy tozatyn ulan-ǵaıyr dalamyzdy aq bilektiń kúshimen, aq naızanyń ushymen qorǵaǵan batyr babalarymyzdyń erligi sahnalandy. Qoıylym aıaqtala salysymen til aılyǵy aıasynda ótken túrli baıqaýlardyń jeńimpazdary men júldegerleri marapattaldy.
"Almaty oblysynda til aılyǵy jarıalanǵan bolatyn. Sol aılyqtyń aıasynda kóptegen baıqaýlar men tildiń qoldanylý aıasyn keńeıtý turǵysyndaǵy sharalar ótkizildi. Sol sharalardy biz búgingi merekede qorytyndylap, nátıjesin shyǵaryp otyrmyz. Búgingi Qazaqstan halqy tilderiniń merekesi kúni qutty bolsyn!" - dedi oblystyq tilderdi damytý basqarmasynyń basshysy Aıdar Bashbaev.
Almaty oblysynda til aılyǵy barysynda «Til – parasat» baıqaýymen qatar «Til sheberi», «Slaván jazýlary», «Latyn álippıinde esse jazý» jáne kórkemsóz oqý sheberleriniń baıqaýy uıymdastyryldy. Aqıyq aqyn Jumeken Nájimedenovtiń óleńderin naqyshyna keltire oqıtyn Aleksandra Mıheeva búgin «Til – parasat» baıqaýynyń jeńimpazy atandy. Ol tusaýkeser, dıalog qurý, esse jazý, óz ónerin kórsetý sıaqty tórt kezeń boıynsha ótti.
"Óte jaqsy. Árıne, úıdegilerdiń bári qýanyp jatyr. Ózim bas júlde alamyn dep oılamadym. Sebebi qarsylastarym myqty. Eshqandaı múmkindik bolmaıdy dep oıladym. Júregim qazaq tili dep soǵady. Júregim qazaq dep soǵady", - dep atap ótti «Til – parasat» baıqaýynyń jeńimpazy Aleksandra Mıheeva.
Ótken jyly elimizde 5 qyrkúıek – Qazaqstan halqy tilderiniń kúni bolyp belgilendi. Árıne, til merekesin atap ótý úshin bul kún teginnen-tegin tańdalǵan joq. 1872 jyly 5 qyrkúıekte qazaq til bilimi ǵylymynyń atasy, kórnekti ádebıet zertteýshisi Ahmet Baıtursynov dúnıege keldi. «Bul salada atqarylatyn jumystardyń aýqymy óte keń. Endi «Rýhanı jańǵyrý» baǵdarlamasy aıasynda qazaq tilin latyn grafıkasyna kóshirý máselesine aıryqsha basymdyq beriledi, – dedi oblystyq tilderdi damytý basqarmasynyń basshysy Aıdar Bashbaev.
