Shymkenttik pedagogtar kópten kútken baspanany jeńildikpen kredıtteýge arnalǵan sertıfıkatqa ıe boldy, dep habarlady Qamshy.kz aqparat agenttigi Sputnik Qazaqstan saıtynyń deregin negizge alyp.
Qala basshysy Ǵabıdolla Ábdirahymov ustazdar qaýymyn kásibı merekelerimen quttyqtap, birqataryna tosyn syı jasady. Ákim bul merekede birinshi kezekte óz anasyn quttyqtaǵanyn aıtyp berdi.
"Ózderińiz bilesizder, men anamnyń muǵalim bolǵanyn únemi aıtyp kelemin. Keshe ózim habarlasyp quttyqtadym. Bir qýanyp qaldy, negizi kúnde kórip júr ǵoı. Sizderge sálem aıtyp jatyr. Ol kisi qazir Saryaǵashtaǵy úıde demalysta", — dep áńgimesin bastaǵan Ǵabıdolla Ábdirahymov muǵalimderdiń kez kelgen adamzat úshin alar orny erekshe ekenine toqtaldy.
"Árbir adamnyń ómirinde ustazy bolady. Ol, árıne, aldymen anasy. Keıin balabaqshadaǵy tárbıeshisi, mekteptegi ustazy, joǵary oqý ornyndaǵy oqytýshysy. Tipti adam jumysqa ornalasqanda da baǵyt-baǵdar beretin ustazy bolady. Sondyqtan muǵalimder kúni barlyq adamzat úshin mańyzdy kún… Juma kúni elbasymyz óziniń halyqqa kezekti joldaýyn joldady. Úkimet pen ákimderge naqty tapsyrmalar berdi. Sonyń ishinde pedagogtardyń statýsyn arnaıy zańmen anyqtaý týraly másele kóterdi. Osy boıynsha biz usynystarymyzdy úkimetke jiberemiz. Ony, árıne, ózderińizben aqyldasatyn bolamyz", — dedi Shymkent basshysy.
Saltanatty shara kezinde 19 muǵalimge qala ákimdigi tarapynan "7-20-25" baǵdarlamasy boıynsha turǵyn úıdi jeńildikpen nesıeleýge arnalǵan alǵashqy sertıfıkat tabystaldy. Iaǵnı, ákimdik olardyń árbirine turǵyn úıdiń bastapqy jarnasynyń 10 paıyzyn tóleıdi. Osyndaı syılyqqa ıe bolǵandardyń biri – 15 jyldan beri ustazdyq jolda eńbek etip kele jatqan №50 mektep muǵalimi Ásem Turalıeva. 35 jastaǵy kelinshek tórt balanyń anasy. Osydan alty jyl buryn baspana alý úshin kezekke turǵan. Al byltyrdan bastap "Turǵyn úı jınaq banki" arqyly shot ashyp, aı saıyn shamasynyń kelgeninshe qarjy quıyp kelipti. Ákimdikten beriletin sertıfıkat týraly Ásem múldem bilmedim deıdi.
"Maǵan sertıfıkat beriletin kúni qalalyq bilim basqarmasynan habarlasyp, merekelik sharaǵa mindetti túrde qatysý kerektigimdi aıtty. "Ne úshin?" dep suraǵanymda, "Ákim quttyqtaıdy" dedi. Shyny kerek, meniń aty-jónimdi aıtyp, sahnaǵa shaqyrǵanda tóbem kókke jetti. Alǵashynda ne syılyq ekenin bilmedim. Keıin ákimdiktegiler túsindirip berdi. Qatty qýandym. 11 jyl boldy turmysqa shyqqanyma. Ata-enemniń qolynda turamyz. Bizden bólek qaıyn aǵam otbasymen turady. Osy rette qala ákimine erekshe alǵysymdy bildirgim keledi", — dedi muǵalim.
Aıta keteıik, kásibı mereke qarsańyndaǵy sharada sertıfıkattan bólek birqatar ustazdar qala ákimi atynan Alǵys hattar men syılyqtarǵa ıe boldy.
