Bıylǵy jyldyń bes aıynda Qazaqstan men Mońǵolıa taýar aınalymy $28,8 mln-ǵa jetti, onyń ishinde eksport $28 mln-dy quraıdy dep jazady Qamshy.kz aqparat agenttigi.
Qazaqstan Mońǵolıaǵa temeki ónimderi men raps tuqymyn eń basty jetkizýshilerdiń biri bolyp tabylady, tek 2017 jyldyń ózinde osy elge 25 mln AQSH dollardan astam somaǵa taýar jetkizdi, dep málimdedi Qazaqstannyń Syrtqy saýda palatasynyń baspasóz qyzmeti.
Endi mońǵolıalyq kompanıalar Qazaqstannan aýylsharýashylyq ónimderin, kondıterlik buıymdardy jáne qurylys materıaldaryn ımporttaýǵa qyzyǵýshylyq tanytyp otyr. Bul týraly taraptar qazannyń basynda Ulan-Batorda ótken elimizdiń saýda-ekonomıkalyq mısıasy barysynda ýaǵdalasty. Mısıany uıymdastyrýshylar QR Investısıa jáne damý mınıstrligi, Mońǵolıadaǵy Qazaqstannyń Elshiligi, «Atameken» UKP, Qazaqstannyń Syrtqy saýda palatasy jáne Mońǵolıanyń Ulttyq saýda-ónerkásip palatasy bolyp tabylady.
Qazaqstandyq delegasıa negizinen tamaq ónerkásibi ókilderinen, atap aıtqanda, kondıterlik buıymdardy jáne maı ónimderin, sondaı-aq qurylys ındýstrıasyn óndirýshilerden turdy. Mońǵoldyq taraptan 40-tan astam kompanıalar qatysty.
Qazaqstannyń Syrtqy saýda palatasynyń basqarma tóraǵasynyń orynbasary Nuraly Bókeıhanov mısıaǵa qatysýshylarǵa sálem joldaı otyryp, eki eldiń arasyndaǵy ekonomıkalyq yntymaqtastyq edáýir tyǵyz baılanystarǵa ulasqanyn atap ótti.
«Mońǵolıa, damýshy ekonomıkasy bar el bola otyryp, ınfraqurylym, energetıka, sondaı-aq bilim men mádenıet salalaryndaǵy ekijaqty yntymaqtastyqty damytýdyń zor perspektıvalaryna ıe. Elderimizdiń arasyndaǵy saýda-sattyq baılanystary nyǵaıa túsýde. Kásipkerlik qoǵamdastyq túrli salalardaǵy burynnan kele jatqan jáne jańa baılanystardy nyǵaıtýda», - dedi N. Bókeıhanov.
Eki el arasyndaǵy taýar aınalymy 2017 jyly 74,8 mln AQSH dollaryn qurady, onyń ishinde 72,5 mln dollar – Qazaqstannyń Mońǵolıaǵa eksporty. Bıylǵy jyldyń bes aıynda taýar aınalymy 28,8 mln dollarǵa jetti, onyń ishinde eksport 28 mln dollar. Temeki men raps tuqymynan basqa Qazaqstan Mońǵolıaǵa un ónimderin, gıgıenalyq jáne jýý quraldaryn jetkizedi.
«Qazaqstannyń Syrtqy saýda palatasy eki eldiń kásipkerlik qoǵamdastyqtarynyń arasyndaǵy yntymaqtastyqty damytý úshin kelissózderge arnalǵan alań usyna otyryp, osyndaı is- sharalardy uıymdastyrady. Sondaı-aq biz mońǵoldyq bıznesmenderge Qazaqstan aýmaǵyndaǵy barlyq salalar boıynsha senimdi ári adal nıetti seriktester tabýǵa kómek kórsete alamyz», - dedi N. Bókeıhanov kezdesý ıelerine qarata aıtqan sózinde.
Mısıa barysynda eki eldiń bıznes qoǵamdastyqtary ınvestısıa, logıstıka jáne saýda salalaryndaǵy ekijaqty yntymaqtastyqtyń perspektıvalyq máselelerin talqylady.
Atap ótken shara barysynda «Baıan Sulý» jáne «Eurasian Foods Corporation» kompanıalary kondıterlik jáne maı ónimderin jetkizý týraly dıstrıbúterlik kelisim jasady.
