Sherhan aǵamen alǵash 1992 jyly Almatyda júzdestim. Qańtar aıynyń ortasy bolatyn. "Egemendi Qazaqstan" gazetiniń redaksıasynda, óz kabınetinde qabyldady. Ol kezde men Mońǵol úkimeti janyndaǵy Monsame agenttiginiń arnaýly tilshisimin. Qazaqstanǵa alǵash ret arnaıy issaparmen kelgenim. Bir saǵattan astam ýaqyt uzaq áńgimelestik. Áńgimesi tartymdy, áserli ári shynaıy. Redaksıada eshqandaı búrokrattyq joǵy birden ańǵarylyp turdy. Orynbasasarlary emen-erkin kirip-shyǵyp, áldebir qaǵazǵa qol qoıdyryp alady, áńgime arasynda olarǵa tapsyrmalaryn da berip tastaıdy. Biraz ýaqyttan keıin Sheraǵań maǵan suraq qoıdy: 
- Mońǵoldar Ulanbatyrdyń ataýyn ózgertpek boldy dep estidim. Aqyry, qalaı sheshiletin boldy?
- Iá, aǵa! Parlamentte Ulanhúú degen jas demokrat sondaı másele kóterdi. 
- Ulanbatyrdyń nesi unamaı qalypty, ol jigitke? 
- Onyń aıtqan ýáji bylaı boldy: "Ulanbatyr (qyzyl batyr) ataýyn Komınternniń ókili qyzyl bólshevık Turar Rysqulov qoıǵan. Endi, bul ataý - saıası qate. Basqasha atalýy kerek". Sonda, bir qart depýtat: "Aldymen, jas demokrat sizdiń máseleńizdi sheship alaıyq. Seniń de ákeń qyzyl bólshevık bolǵanǵa uqsaıdy. Sebebi, atyńdy Ulanhúú (qyzylbala) dep qoıǵan eken. Sen óz esimińdi Hóhhúú (kókbala) nemese Saǵanhúú (aqbala) dep ózgertip kel. Máseleni sodan keıin qarastyrýǵa bolady" - degende parlament músheleri qyran-topan kúlkige qarq boldy da usynys kúntártibinen alynyp tastaldy - dedim. 
Sheraǵań raqattana kúldi de Álgi esimderdi qaıtalap surap, qaǵazǵa túrtip aldy. 
Erteńinde "Egemendi Qazaqstannyń" "Dúbirge toly dúnıe" aıdarynda "Ulanbatyr ataýy ózgergen joq" degen taqyryppen shaǵyn mátin jarıalanǵan edi.
Jalpy, Sherhan Murtaza - jaǵympazdyqtan aýlaq, týrashyl sanaýly jazýshylardyń biregeıi edi. Aqıqatty izdedi, ony jer betinen tappady. Endi, máńgilik ómirge ózi aqıqat bolyp attandy. Ómir zańy solaı.

Qýandyq Shamahaıuly