Qyrǵyzstan Qazaqstannan ımporttalatyn taýyq etine ýaqytsha shekteý qoıdy dep jazady Qamshy.kz aqparat agenttigi Azattyqtyń deregin negizge alyp. Bul jóninde Qyrǵyzstannyń veterınarlyq jáne sanıtarlyq qaýipsizdik jónindegi memlekettik ınspeksıasy habarlady.

Mekemeniń baspasóz hatshysy Rahat Sadyrbekovanyń aıtýynsha, shekteýge Qazaqstanmen shektesetin aımaqta qus tumaýy indetiniń órshı túsýi sebep bolǵan. Osyǵan baılanysty, Qazaqstan bıligine jaǵdaıdy anyqtaý úshin resmı suraý joldanǵan.

Qazaqstannyń veterınarlyq qyzmetiniń jaýabyna baılanysty shekteý alynyp tastalady, ıa uzartylady.

"Jaǵdaıdy tolyq anyqtaý úshin ýaqytsha shekteý qoıyldy. Sheshim Qazaqstan tarabynyń resmı jaýabyna baılanysty bolmaq. Eger kórshi eldegi jaǵdaı sonshalyqty qaýipti bolmasa, shekteýdi alyp tastaımyz" dedi Sadyrbekova.

Sanıtarlyq ınspeksıa sonymen birge áleýmettik jelide taralǵan qus etinen Núkasl indeti tabyldy degen aqparattyń shyndyqqa sáıkes kelmeıtinin málimdedi.