Ortalyq komýnıkasıalar qyzmetinde QR Prezıdentiniń janyndaǵy Áıelder isteri jáne otbasylyq-demografıalyq saıasat jónindegi ulttyq komısıa músheleri (budan ári – Ulttyq komısıa) jáne QR Mádenıet jáne sport vıse-mınıstri «Mereıli otbasy» Ulttyq konkýrsyn ótkizý suraqtaryna arnalǵan baspasóz konferensıasy ótti.
İs-sharaǵa QR Prezıdentiniń janyndaǵy Áıelder isteri jáne otbasylyq-demografıalyq saıasat jónindegi ulttyq komısıa tóraıymynyń orynbasary, QR Ortalyq saılaý komısıasynyń múshesi Lázzat SÚLEIMEN, QR Prezıdentiniń janyndaǵy Áıelder isteri jáne otbasylyq-demografıalyq saıasat jónindegi ulttyq komısıa múshesi, QR Parlamenti Májilisiniń depýtaty Baqytbek SMAǴUL, Qazaqstan Respýblıkasynyń mádenıet jáne sport vıse-mınıstri Aqtoty RAIYMQULOVA qatysty.
Elimiz 2013 jyldan beri jyl saıyn qyrkúıek aıynyń ekinshi jeksenbisinde «Otbasy kúni» meıramyn atap ótedi. Memleket Basshysynyń ókimimen jyl saıyn ótkiziletin «Mereıli otbasy» Ulttyq konkýrsy (budan ári – Konkýrs) osy ataýly kúnge oraı márege jetedi.
Konkýrs osymen besinshi ret ótkizilýde.
Ulttyq komısıa tóraǵasynyń orynbasary, Ortalyq saılaý komısıasynyń múshesi Lázzat Súleımen atap ótkendeı, bıyl Ulttyq konkýrsqa 2952 otbasy qatysty, bul kórsetkish 2014 jyly ótken alǵashqy baıqaýmen salystyrǵanda 2,3 esege kóp.
Óziniń bes jyldyq tarıhynda Konkýrsqa 11 993 otbasy qatyssa, onyń 60 % (7172 otbasy) aýyldyq jerde turatyn otbasylar. Sondaı-aq, barlyq qatysýshylardyń 37 % (4479) kóp balaly otbasylar, 18% (2128) jas otbasylar, 17% (2076) eńbek áýletteri jáne 7% (822) basqa ult ókilderi.
Óz kezeginde Mádenıet jáne sport vıse-mınıstri Aqtoty Raıymqulova brıfıńke qatysýshylarǵa Konkýrstyń aqtyq synyna shyqqan 16 otbasy týraly áńgimelep berdi.
Búginde Ulttyq komısıa otbasy tárbıesindegi ákeniń rólin arttyrý, balalardyń boıynda patrıottyq sezimdi qalyptastyrýda ákeniń rólin nyǵaıtý máselesine qoǵamnyń nazaryn arttyrý, «Rýhanı Jańǵyrý» aıasynda urpaqtyń bilimge qushtarlyǵyn oıatý sıaqty jaıttarǵa erekshe nazar aýdarýda.
Bul týraly Ulttyq komısıanyń múshesi, Parlament Májilisiniń depýtaty Baqytbek Smaǵul aıtyp berdi.
«Mereıli otbasy» konkýrsynyń fınaldyq kezeńinde jeńimpazdy anyqtaýǵa SMS-habarlar arqyly jáne kaztube.kz saıtynda ınteraktıvti daýys berý arqyly elimizdiń barlyq azamattary tikeleı qatysa alady.
Daýys berý qorytyndysy 2018 jylǵy 8 qyrkúıekte «Qazaqstan» OKZ-da ótetin saltanatty jıynda jarıalanady. Jeńimpazǵa «Mereıli otbasy» Ulttyq konkýrsynyń laýreat ataǵy beriledi.
