Qazaqstanda tyıym salynǵan "Tablıǵı jamaǵat" ekstremıstik uıymynyń negizinde qurylǵan "Iaqyn Inkar" uıymy ekstremıstik dep tanyldy, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp. 

Bas prokýratýra "Iaqyn Inkar" uıymy elimizde zańsyz qyzmet etkenin anyqtaǵan. "Iaqyn Inkar" – Qazaqstanda tyıym salynǵan "Tablıǵı jamaǵat" ekstremıstik uıymy negizinde qurylǵan. 

Baspasóz qyzmetiniń aqparatynsha, "Iaqyn Inkar" uıymynyń maqsaty –konstıtýsıalyq qurylysty kúshtep ózgertip, egemendikti buzý arqyly jekelegen memleketterde, sonyń ishinde Qazaqstan aýmaǵynda "halıfat" qurý.

"Atalǵan uıymnyń jaqtastary qaqtyǵysqa alyp kelý múmkindigin bile tura, ózge dinderdi joqqa shyǵarady, bul áreket dinı ekstremızm uǵymynyń belgilerine saı keledi. "Iaqyn Inkar" múshesi bolǵan Qazaqstannyń jekelegen azamattary elimizdiń aýmaǵynda ekstremıstik áreket jasaǵany úshin bas bostandyǵynan aıyryldy", — delingen habarlamada. 

Qylmystyq ister aıasynda osy uıym músheleriniń Qazaqstan aýmaǵynda toptar qurý nıeti bolǵany anyqtaldy. Osyndaı negizder boıynsha "Iaqyn Inkar" uıymy Qyrǵyzstanda ekstremıstik dep tanylǵan.

Osyǵan baılanysty Astana prokýratýrasy sotqa "Iaqyn Inkar" uıymyn ekstremıstik dep taný týraly aryzben júgindi.

Habarlamada aıtylǵandaı, Esil aýdandyq sotynyń osy jyldyń 10 qazanyndaǵy sheshimimen aryz tolyq kólemde qanaǵattandyryldy. Sot "Iaqyn Inkar" uıymynyń áreketin ekstremıstik dep tanyp, onyń qyzmetine Qazaqstan Respýblıkasynyń barlyq aýmaǵynda, sonyń ishinde aqparattyq materıaldar, buqaralyq aqparat quraldary, telekomýnıkasıa, áleýmettik jeliler, messendjerler jáne beınehostıngter arqyly taratýǵa tyıym saldy.

Bas prokýratýra "Iaqyn Inkar" ekstremıstik uıymyna qatysý, olardyń ıdeıasyn nasıhattaý, qarjylandyrý úshin qylmystyq jaýapkershilik qarastyrylǵanyn eskertti.