Keshe «Qazaqstannyń buqaralyq aqparat quraldary men áleýmettik jelilerinde «Qazaqstannyń azamattyǵyn alý úshin sheteldikterge 150 myń dollar tóleý jetkilikti» degen aqparat tarap ketti.

♦QR azamattyǵy sheteldikter úshin $150 000 tura ma?

Alaıda keıinnen bul aqparattyń aqıqatqa saı kelmeıtini anyqtaldy. Biraq dúnıe júzinde mundaı aqshaǵa azamattyq bere salatyn elder bar. Ol úshin ınvestor el ekonomıkasyna mol qarjy quıyp, qazynaǵa kóp mólsherde salyq tóleýi kerek. Sonymen...

Osydan biraz ýaqyt buryn Bloomberg agenttigi azamattyqty aqshaǵa satyp alýǵa bolatyn memleketterdiń tizimin jarıalady. Ol úshin eń aldymen el ekonomıkasyna tıisti mólsherde ınvestısıa quıýýyń kerek.

Sonymen qaltańyzǵa qarjyńyz syımaı bara jatsa, siz qaı eldiń azamattyǵyn alar edińiz? Agenttiktiń dereginshe, alǵashqy ondyqqa on el kirgen. Sonyń ishindegi segizi halyqaralyq valúta qorynyń deregi boıynsha ofshorlyq aımaq bolyp sanalady. Biraq sarapshylardyń aıtýyna qaraǵanda,  baı kásipkerlerdiń kóbisi azamattyqty basqa sebeppen satyp alatyn kórinedi. Onyń ishinde qarjydan jaltarý  deregi negizgi sebep ekeni sózsiz. Al azamattyq alýǵa bolatyn eń qymbat elderdiń biri – Avstrıa. Avstrıa tólqujatyn alý úshin siz el ekonomıkasyna 23,75 mıllıon dollar quıýyńyz kerek. Odan keıingi orynda 2,375 mıllıon dollarmen Kıpr memleketi tur. Úshinshi oryndy Malta eli alady. Ol úshin siz atalǵan eldiń qazynasyna 1,065 mıllıon dollar ınvestısıa tóleýińiz qajet. Tipti  menshigińizdegi ıahtańyz ben eki ushaǵyńyz arqyly da Malta eliniń  tólqujatyn alýǵa bolady. Al eń arzan el qaısy? Sonymen, kishkentaı araldaǵy Domınıka, Sent-Lúsıa, Antıgýa jáne Barbýda elderine 100 myń dollar berseńiz, qınalmaı, jedel túrde atalǵan memlekettiń azamaty atana alasyz. Al  Egıpet parlamenti buǵan qatysty arnaıy  zań qabyldap, muny jaqynda ǵana bekitti. Eger sheteldik azamat Egıpette bes jyl turyp, el ekonomıkasyn damytýǵa  400 myń dollar bóletin bolsa, onda eldiń azamattyǵyn alýǵa tolyq quqysy bar.

...Árıne, baı adamǵa bul túk emes, al basqaǵa qıyn.

Berik Beısenuly