"Óner ultqa bólinbeıdi, kerisinshe biriktiredi. Demek men qolyma dombyra alǵanda qazaqpyn",- dep aǵynan jaryldy japon azamaty Fýkı Iagı. Dombyranyń únine ǵashyq, júzi jyly Fýkı Iagıdiń "Men Qazaqpyn" halyqaralyq baıqaýynda qonaq retinde kelip qatysýy qalyń kórermendi tánti etti. Qamshy.kz aqparat agenttigi Fýkı Iagıdi jaıly keńirek aqparat berýdi jón sanady.

Fýkı Iagıdiń feısbýk paraqshasyn izdep taptyq. Alaıda ózi jaıly mardymdy eshqandaı aqparat jarıalamapty. Óz ómirin qupıa ustaýdy uıǵarǵan 27 jastaǵy Fýkı Iagıdiń tek 2010 jyly Mońǵolıada barǵan saparynda Qazaqstanǵa degen qyzyǵýshylyǵy oıanǵanyn bilemiz. Kóp uzamaı qazaq ónerin, salt-dástúrin zertteý, zerdeleý úshin Qazaq eline at terletip kelgen Fýkı Iagı kópke úlgi bolarlyq jan. Sebebi ol bes jyl boıy qazaq ónerin zerttep keledi. Qazaqsha úırenip qana qoımaı dombyranyń qulaǵynda sheber oınaýdy meńgerip alǵan japon azamaty qazaqtyń dástúrli ánderin oryndaǵannan rýhanı lázzat alady eken. «Tańsholpan» baǵdarlamasyna qonaq bolyp kelgen sátinde Fýkı Iagı «Qaıran zamandy» oryndap berýi beker emes. Qazaq pen japon halqy úndes keledi, tipti jetigen aspaby japondardyń kato aspabyna qatty uqsaıtynyn tilge tıek etken bolatyn. Qazaq tili kúrdeli til ekendigin moıyndaı otyra ol eshqandaı arnaıy til kýrstaryna barmaǵanyn ashyq aıtty. Bolashaqta Japonıaǵa oralǵanda Fýkı Iagı qazaq mádenıetin óz elinde nasıhattaýǵa kúsh salatynyn jetkizdi.