Adam balasyn ǵaıbattamaıtyn, tek óziniń ádemi oılarymen, aqyndyq álemimen ómir súrgen sábı jandy taǵy bir adam ótti jalǵannan. Eki jyl buryn úıinde turǵan Máshhúr Júsip atamyzdyń jeti tomyn alyp kep berdi. Budan bylaı sende bolsyn dep. Byltyr kóktemde aýrýhanadan shyǵa salyp qalt-qult etken qalpy maǵan kelipti. "Oıbaı-aý, úıge aparmadyńyzdar ma?",-dedim aǵanyń túrinen shoshyp. Qyzy "Sizge baramyn dep qoımaı qoıdy",- deıdi. Birer kese shaı iship, kishkene jeńildep qaldym ǵoı dep úıine ketti. Ótkende kelip qoshtasyp, batasyn berip ketti. Asyǵystaý edim. Kólikke birge otyryp Gogol men Baızaqov kósheleriniń qıylysynan tústi. Taǵy da "Tulparyń toqtamasyn!" dep esikti ashyp biraz turdy. Iá, qoshtastyq! "Sońǵy sátte atyńdy aıtty" deıdi jańa jeńgeı habarlasyp. Al men tań ata tús kórgem. Telefonnyń ar jaǵynan bir egdeleý adam án salyp turdy da kilt toqtady... Án ádemi bolatyn... "Aǵa-aǵa!" dep jatyp oıanyp kettim. Baryp telefondy qarasam "Ábdirahman aǵadan aıyrylyppyz" degen Qalqaman baýyrymnyń habaryn oqydym. Júregim qan jylady! Úsh júzden asa ánge mátin jazǵan eken. Ánge mátin jazatyn aqyndardy keıde aqyn qataryna qosqysy kelmeıtinder bar. Shyndap qarasaq, naǵyz eńbek solardyki. Ánniń árbir ıirimine sulý teńeý men tátti tirkesterdi, shymyr uıqastardy taýyp salý kez-kelgenniń qolynan kele bermeıdi. Al, myqty jazylǵan mátin ánniń baǵyn jandyryp, oryndaýshynyń da, tyńdarmannyń da rýhyn oıatady. Ábdirahman aǵa balalarǵa arnap óte kóp jazdy. Bala janyna tereń úńilgen, týmysynda meıirman adam bolsa osy kisi shyǵar. Ol shyǵarmalary da on tom bolyp jaryq kórdi. Mektep oqýlyqtarynyń ár synybyndaǵy kitaptarda ol kisiniń óleńderi bar desem qatelespespin, sirá. Menińshe qandaı qurmetke de laıyq adam.

Baıǵalı Esenáli