Almatyda esirtki quraldaryn, psıhotroptyq zattardy, prekýrsorlardy tasymaldaıtyn arnalardy shekteý jáne aldyn alý maqsatynda «Kanal-Krasnyı Barhan» jedel aldyn alý is-sharasy júrgizilýde dep habarlaıdy Qamshy.kz aqparat agenttigi Almaty qalasy İİD Baspasóz qyzmetine silteme jasaı otyryp.

«Bul is-shara qala mańyndaǵy shaǵyn aýdandardyń birinde ótkizildi. İs-shara barysynda esirtkige táýeldilerge arnalǵan baspana tabyldy. Úı ıeleri – 1969 jyly týǵan Sh. esimdi azamat pen 1984 jyly týǵan P. esimdi azamatsha.

Bizdiń bólimsheniń qyzmetkerleri, SOBR jaýyngerleri, kınologıa qyzmetterimen birlesip arnaıy is-shara ótkizdi, sonyń nátıjesinde sot-hımıalyq saraptama kórsetkendeı, jalpy salmaǵy 110 gramnan astam esirtki zaty «geroın» tabyldy. Tergeý barysynda páterge nashaqorlar esirtki satyp alý úshin kelip júrgeni belgili boldy. Aıtpaqshy Sh.esimdi azamat burynyraqta bótenniń múlkin urlaǵany úshin, al, P.esimdi azamatsha esirtki quraldaryn saqtaǵany úshin sottalǵan», - dep aıtty Almaty qalasy İİD Esirtkige qarsy kúres basqarmasynyń bastyǵy, polısıa polkovnıgi Nurlan Moshkalov.

Qazirgi ýaqytta QR QK 297 bap 3 tarmaq jáne 302 bap esirtki quraldaryn, psıhotroptyq zattardy, olardyń analogtaryn jiberý nemese satý maqsatynda zańsyz daıyndaý, óńdeý, satyp alý, saqtaý, tasymaldaý, sondaı-aq, osylar úshin úı berý nemese uıymdastyrý boıynsha tergeý júrgizilýde. Kúdiktiler Almaty qalasy İİD ýaqytsha ustaý ızolátoryna qamaldy.