Ómirde eshbir oqıǵa sebepsiz bolmaıdy. Sol sekildi meniń jubaıymmen tanysýǵa óner sebepshi boldy. Tolqyn ekeýmizdi tabystyrǵan Temirbek Júrgenov atyndaǵy Óner akademıasy. Ony alǵash ret osy qara shańyraqta kezdestirgen edim. Aqylyna kórki saı qyzǵa kim yntyq bolmasyn? Stýdentpiz, albyrt kezimiz, jastyqtyń jalynymen Tolqyndy bir kórgennen unattym. Jolyǵysa qalsaq ekeýmizdiń áńgimemiz jarasa ketetin. Men halyq ártisi Tilektes Meıramovtyń shákirti bolsam, ol halyq ártisi Esmuhan Obaevtan dáris aldy. 1997 jyly oqýdy támamdap, «Tamasha» oıyn -saýyq otaýynda redaktor ári akter bolyp qyzmet jasadym. Osy kezde Tolqyn 2-kýrsta oqyp júretin. 1998 jyly «Tamashanyń» 20 jyldyq mereıtoıyndaǵy úlken konsertte Luqpan Esenov aǵamyz onyń ónerdegi tusaýyn kesti. Óner baspaldaǵynyń dál osy teatrdan bastalǵanyna jáne bir ujymda jumys isteıtinimizge qatty shattandym. Ol drama teatrda jumys isteýdi armandaıtyn. Shyǵarmashylyǵynyń kenetten satıra janryna burylyp ketkenin ózi de baıqamaı qalsa kerek. Osylaısha oqý men jumysty qatar alyp júrdi. Qazaqstannyń barlyq oblystaryn aralaǵan «Tamashanyń» gastróldik saparlary ekeýmizdi odan saıyn jaqyndastyra tústi.
Saǵadildá Úsipáli, akter: «MýzArttyń» tusaýy bizdiń toıda kesilip, ataýyn da ózim qoıǵanmyn»
Tolqyn ekeýmizdiń qyz ben jigit bolyp júrgen aralastyǵymyz birneshe jyldan keıin, ıaǵnı 2001 jyly otbasyn qurýǵa ulasty. Almatyda eldiń esinde qalǵan dúrkiretip toı ótkizdik. Qazaqstan estradasynyń juldyzdary kóptep atsalysqan keremet toı bolǵanyn áli kúnge deıin saǵynyshpen eske alamyz. Betashardy qazaqtyń ardaqty aqyny, dosymyz, marqum Orazáli Dosbosynovtyń sýyryp salyp aıtqan tókpe jyrlarymen ashqany da kúni keshegideı. Toıymyzdyń taǵy bir jarqyn esteligi sol keshte «MýzArt» tobynyń tusaýy bizdiń úılený toıymyzda kesilip, toptyń ataýyn qoıý baqyty da maǵan buıyrǵan edi.
2003 jyly tuńǵysh qyzymyz Aısha dúnıege keldi. Al, 2006 jyly ulymyz Aıqynjaryq ómirdiń esigin ashty. Al, 2012 jyly Almatydan Astanaǵa qonys aýdardyq. Astanaǵa kelgennen keıin Arý degen qyzymyz týyldy. Allaǵa shúkir, otasqan jyldardan beri bir-birimizben jaman sózge kelmeı otbasynyń tútinin túzý shyǵarýǵa bekingenbiz. Qudaı qosqan qosaǵym búginde «Shalqar» ulttyq arnasynda redaktor-júrgizýshi bolyp qyzmet etip keledi. Ómirde de, ónerde de jubymyz jazylmaı kele jatqany úlken syılastyqtyń, mahabbattyń jemisi dep bilemin.
Aınur Ońǵarbaı
