Jaqynda Astana qalasynda «KATEV» Halyqaralyq qoǵamdyq qorynyń uıytqy bolýymen jyl saıynǵy "Jarqyn bolashaq" qazaq tili olımpıadasy máresine jetti. Bul týraly "Qamshy" portaly habarlaıdy.
Bıyl jetinshi ret ótkizilip otyrǵan "Jarqyn bolashaq" qazaq tilinen bilim báıgesiniń aqtyq máresinde Qazaqstannyń oblystary men aımaqtarynan kelgen 7-11 synyp oqýshylary 5 konkýrs boıynsha, ıaǵnı, tilshi-ádebıetshiler, ánshi-bulbuldar, jas ǵalymdar, sóz sheberleri jáne jazýshylar baǵyttary boıynsha baq synasty.
Bıylǵy Respýblıkalyq olımpıadanyń qorytyndy básekesine júzden júırik, myńnan sýyrylyp shyqqan 171 oqýshy qatysyp, bilim báıgesinen oza shaýyp, júldeger atanǵan oqýshylarǵa olımpıadalyq medal jáne baǵaly syılyqtar tabystaldy. Sondaı-aq, Júldeli 1, 2, 3 oryn ıegerlerine elimizdegi bedeldi sanalatyn JOO-nyń 29 bilim granttary tabys etildi.
Úsh kúnge sozylǵan bilim báıgesiniń qorytyndy gala-konserti Astana qalasynda "Qazmedıa" ortalyǵynda ótti.
"Jarqyn bolashaq" qazaq tili olımpıadasynyń jabylýy saltanatyna QR Parlamenti depýtattary men qoǵam qaıratkerleri, Qazaqstannyń oblystarynan arnaıy kelgen qonaqtar men alys-jaqyn shet elderden syıly meımandar qatysty. Sondaı-aq, bilim olımpıadasynyń jabylýy saltanatynda Qazaqstan Respýblıkasynyń Bilim jáne ǵylym vıse-mınıstri N.Imanǵalıev myrza sahna tórine shyǵyp, QR Premer-Mınıstrdiń orynbasary B.M.Saparbaevtyń quttyqtaý hatyn jetkizdi.
Nurgeldi Ábdiǵanıuly
